Шлях самурая: як жыхар Прылесся змагаецца за бел-чырвона-белыя жалюзі

Незвычайная гісторыя шматдзетнага бацькі з Менскага раёна.

Жыхара Менскага раёна судзяць паводле артыкула 23.34 КоАП. Міліцыя палічыла бел-чырвона-белыя жалюзі ў акне адзіночным пікетам. Мужчына пярэчыць: справа не ў палітыцы, а ў ягоных хрысціянскіх поглядах.

Да таго ж, распавёў ён tut.by, цяпер у яго вокнах бачны хутчэй японскі сцяг.

У судзе. «Гэта не сцяг, гэта жалюзі»

Сяргей Мельянец жыве ў вёсцы Прылессе Менскага раёна. Жанаты, у сям'і сямёра дзяцей. Адміністрацыйную справа ў дачыненні да мужчыны сёння разглядалі ў судзе Менскага раёна.

У пратаколе міліцыянта з Менскага РУУС сказана, што 15 снежня ў вокнах дома Сяргея Мельянцоў выявілі два бел-чырвона-белыя сцягі, вывешаныя «на агульны агляд».

Так выглядалі вокны ў доме, калі прыходзіў міліцыянт, распавядае Сяргей Мельянец. ФОТА: ПАДАДЗЕНАЕ ГЕРОЕМ МАТЭРЫЯЛУ

Такі сцяг не зарэгістраваны «ў адпаведнасці з пунктам Закона «Аб афіцыйных геральдычных сімвалах», паказвае міліцыя, а значыць, жыхар дома «наўмысна правёў адзіночны пікет, без адпаведнага дазволу Менскага райвыканкама», «публічна выказаў свае грамадска-палітычныя настроі».

- Гэта не сцяг, - патлумачыў у судзе Сяргей Мельянец. - Гэта жалюзі, якія я павесіў у канцы жніўня ў сябе ў спальні. З прычыны таго, што мне падабаюцца гэтыя колеры і яны адлюстроўваюць мой хрысціянскі светапогляд. Белы колер сімвалізуе святасць, якую мы, вернікі, атрымліваем дзякуючы пралітай Езусам Хрыстом на крыжы крыві за нашы грахі.

У Мельянцова - вышэйшай духоўная адукацыя, кажа, што прытрымліваецца такога веравучэння: пратэстант-баптыст.

- Ці пераследвалі вы мэту выказаць грамадска-палітычныя настроі? - удакладніў суддзя Віктар Шаўцоў.

- Я пераследваў мэту дэманстрацыі перш за ўсё свайго хрысціянскага светапогляду.

Жалюзі зроблены на замову.

Адвакат Міхаіл Баднарчук падаў хадайніцтва: просіць спыніць справу аб адміністрацыйным правапарушэнні, бо само правапарушэнне адсутнічае.

Суддзя папрасіў Сяргея Мельянцоў падаць копіі сведчанняў нараджэння дзяцей і дакумент, які пацвярджае права ўласнасці на дом. Наступнае пасяджэнне ў гэтай справе адбудзецца 21 студзеня.

Але гэта яшчэ не ўсё. «Шлях самурая»

Зараз вокны ў доме Сяргея Мельянцоў выглядаюць не так, як паказана ў міліцэйскім пратаколе, распавёў ён ужо пасля пасяджэння.

Праз некалькі дзён пасля візіту міліцыянта 15 снежня мужчына змяніў выгляд жалюзі з боку двара. Калі знутры яны так і выглядаюць бел-чырвона-белымі палоскамі, то звонку цяпер упрыгожаны ў японскім стылі.

- У той частцы вокнаў, дзе чырвоны колер, мы наклеілі аркушы. Атрымаўся сцяг Японіі з іерогліфамі. Калі міліцыянт прыходзіў да нас другі раз, ён сказаў, што так мы спрабуем замаскаваць «месца злачынства», - усміхаецца Сяргей Мельянец. - А нам вельмі падабаецца сімвалізм японскага сцяга, гэта ж Краіна ўзыходнага сонца, а мы хочам, каб над Беларуссю ўзышло сонца праўды.

Мужчына кажа, што іерогліфы ў акне азначаюць: «свабода», «праўда», «справядлівасць», «шлях самурая», «неўміручасць».

Цікава, што з нагоды такіх упрыгажэнняў на вокнах Сяргей Мельянец нават пісаў у пасольства Японіі ў Беларусі. Спытаў, як там ставяцца да ідэі беларускай сям'і упрыгожыць вокны дома сцягамі Японіі. Таксама ўдакладніў, як у пасольстве ўспрымуць, калі ён надумае прагуляцца па Менску з японскімі сцягамі. «Ці не парушыць гэта якіх-небудзь традыцый і звычаяў вашай краіны?» - спытаў жыхар Менскага раёна.

На пытанні аб сцягу ў акне адказ прыйшоў такі: «Амбасада не мае дачынення да таго, як грамадзяне Беларусі ўпрыгожваюць сваю маёмасць, у тым ліку дамы. У сувязі з гэтым пасольства ўстрымліваецца ад каментароў з нагоды вашых ідэй».

На пытанне аб шпацырах па Менску адказалі так: «Гэты адказ амбасады не з'яўляецца выразам згоды або нязгоды, адабрэння або неўхвалення, падтрымкі або вымовы».