Дзяржсакратар ЗША: Упэўненыя ў сабе палітычныя лідары не баяцца Галасоў канкурэнтаў
2- 18.01.2021, 17:23
- 12,693
Майк Пампэа выступіў з асуджэннем дзеянняў расейскіх уладаў у дачыненні да Навальнага.
Дзяржсакратар ЗША Майк Пампэа асудзіў дзеянні расейскіх улад у дачыненні да палітыка Аляксея Навальнага, паведамляе «Голас Амерыкі»:
- Злучаныя Штаты рашуча асуджаюць дзеянні Расеі арыштаваць Аляксея Навальнага. Мы з сур'ёзнай занепакоенасцю адзначаем, што яго затрыманне з'яўляецца апошняй з серыі спробаў прымусіць замаўчаць Навальнага і іншых дзеячаў апазіцыі і незалежныя галасы, якія крытыкуюць расейскія ўлады.
Упэўненыя ў сабе палітычныя лідары не баяцца галасоў канкурэнтаў, не чыняць гвалту і не затрымоўваюць незаконна палітычных апанентаў. Расейскі народ, як і людзі ва ўсім свеце, заслугоўвае ўрад, які падтрымлівае адкрыты рынак ідэй, празрыстае і падсправаздачнае кіраванне, незалежную судовую сістэму і здольнасць рэалізаваць свае асноўныя правы чалавека на свабоду слова і сходаў, не асцерагаючыся пакарання.
Мы настойліва заклікаем урад Расеі забяспечыць роўныя ўмовы для ўсіх палітычных партый і кандыдатаў, якія імкнуцца ўдзельнічаць у выбарчым працэсе. Праблема не ў Аляксеі Навальным. Мы патрабуем яго неадкладнага і безумоўнага вызвалення.