Расейскія афшоры выявіліся «пацёмкінскай вёскай»
4- 19.01.2021, 15:17
- 17,306
Амбіцыйны праект скончыўся правалам.
Мінфінансаў Расеі падрыхтавала пакет падатковых паблажак, каб завабіць буйны бізнэс у «расейскія афшоры» - спецыяльныя адміністрацыйныя раёны, створаныя на востраве Рускі ў Калінінградзе і на востраве Кастрычніцкі ва Уладзівастоку.
Амбіцыйны праект, задуманы як спосаб вярнуць у краіну выведзены за мяжу капітал, стаўся «пацёмкінскай вёскай». Цяпер у САР зарэгістравана ўсяго 40 рэзідэнтаў, і нават яны «не забяспечваюць рэальнай прысутнасці», распавяла «Известиям» блізкая да ўрада крыніца.
Кампаніі сталі рэзідэнтамі выспаў толькі на паперы, не інвестуюць у развіццё тэрыторый САР і абмяжоўваюцца фармальнымі ўнёскамі мінімальнай сумы.
Такія паводзіны выклікаюць пэўнае здзіўленне ва ўрадзе, кажа крыніца «Известий». Каб прыцягнуць бізнэс, Кабмін рыхтуе пакет ільгот.
Напрыклад, прапануецца знізіць стаўку падатку на вывад капіталу з 15% да 10%, пры ўмове, што кампанія ўкладзе 300 млн рублёў у развіццё інфраструктуры, а таксама створыць там хаця б 15 працоўных месцаў.
Мінфін будзе намагаць на фізічнай, а не фармальнай прысутнасці холдынгавых кампаній у САР, калі яны хочуць скарыстацца ільготамі, заявілі «Известиям» у міністэрстве. Адно з патрабаванняў - арандаваць або выкупіць офіс плошчай, не меншай за 100 кв. м.
Акрамя таго, для рэзідэнтаў САР могуць знізіць падатак на прыбытак да 5%, вызваліць ад платы за даход што да курсавых розніц.
З 2014 года, калі Расея апынулася пад санкцыямі пасля анэксіі Крыма і вайны на Данбасе, урад правёў тры раунды амністыі капіталу, запрашаючы вярнуць у краіну актывы і грошы ў абмен на гарантыі адсутнасці пераследу за падатковыя і валютныя парушэнні.
Апошні раунд амністыі скончыўся ў лютым 2020 года. Расейцы маглі добраахвотна задэклараваць маёмасць і рахункі за мяжой, атрымаўшы вызваленне ад выплаты НДФЛ і падатку на прыбытак кантраляваных замежных кампаній пры ўмове, што яны стануць падатковымі рэзідэнтамі РФ.
Грашовыя сродкі прапаноўвалася рэпатрыяваць у банкі, размешчаныя на тэрыторыі Расеі, а кампаніі - перарэгістраваць ва ўнутраныя афшоры на тэрыторыі САР.
Але ні апеляцыі да патрыятызму, ні стварэнне ўнутраных афшораў з нулявым падаткам на дывідэнды не змаглі разгарнуць назад раку грошай, якія пакідаюць Расею.
Паводле звестак ЦБ, за пяць гадоў амністыі чысты адток капіталу з РФ склаў 189,6 млрд даляраў. За студзень-лістапад 2020 года ён дасягнуў 47,9 млрд даляраў.
Лічбы па адтоку вагаюцца, адлюстроўваючы рух спекулятыўнага капіталу на фінансавым рынку. Пры гэтым структурны адток з Расеі застаецца стабільным пры ўсякай палітыцы: 20-30 млрд даляраў бізнэс выводзіць з краіны ў выглядзе «наўпроставых інвестыцый» за мяжу, падлічылі аналітыкі ING. Гэта грошы, якія кампаніі адпраўляюць у капітал афшорных структур, паркуючы прыбытак за межамі краіны.