Доўгі COVID-19: якія сімптомы хваробы захоўваюцца паўгода

У даследаванні ўдзельнічала больш за 1700 пацыентаў з кітайскага горада Ухань.

Больш за 75 адсоткаў перахварэлых на COVID-19 і праз паўгода працягваюць пакутаваць ад яго наступстваў, паведамляюць кітайскія даследчыкі.

Медыкі называюць гэта постковідным сіндромам, паведамляе Charter97.org на падставе матэрыялаў у СМІ і сацыяльных сетках.

Зацягнутая падтрымка

На галоўнай старонцы закрытай рускамоўнай групы «Нетыповы каранавірус» у Facebook гаворыцца, што яна створаная дзеля некалькіх чалавек, якія хварэюць нестандартнай формай COVID-19 (лёгкай, але зацяжной). «Проста дзеля абмену досведам і ўзаемнай падтрымкі. Спадзяюся, ненадоўга», - напісаў у першым допісе адзін з заснавальнікаў. Група з'явілася 15 красавіка. Сёння ў ёй больш за 37 тысяч чалавек, у дзень публікуецца да 80 паведамленняў.

У асноўным людзі дзеляцца гісторыямі хваробы, апісваюць працяглыя сімптомы і спрабуюць зразумець, як жыць далей. Часцей за ўсё скардзяцца на дыхавіцу, паколванне ў руках і нагах, бессань і беспрычынную трывогу. Некаторыя сутыкаюцца з кан'юктывітам, працяглай, хай і невысокай, тэмпературай і нават выпадзеннем валасоў.

І гэта па ўсім свеце. Дзясяткі тысяч аб'ядноўваюцца ў групы, каб абмяркоўваць постковідны сіндром. Сярод тых, хто перахварэў у ЗША, паводле папярэдніх звестак, апублікаваных летам, такіх - 35 адсоткаў. У Вялікабрытаніі даходзіць да 80.

У Італіі праз два месяцы пасля першых сімптомаў 87,4 адсотка пацыентаў працягвалі скардзіцца на тыя ці іншыя недамаганні. Амаль палова гаварыла пра рэзкае пагаршэнне якасці жыцця.

Даследуй сябе сам

У кастрычніку амерыканка Ханна Дэвіс, якая перанесла вострую фазу COVID-19 у красавіку, выступіла на пасяджэнні Сусветнай арганізацыі аховы здароўя ад імя ўсіх пацыентаў з зацяжным ковідам. Яна распавяла пра папярэднія вынікі даследавання, арганізаванага сіламі саміх хворых.

На працягу паўгода ўзначаленая ёю каманда з 17 актывістаў апытала звыш трох з паловай тысяч чалавек з 56 краін, у якіх сімптомы захворвання захоўваліся і шэсць-сем месяцаў пасля вострай фазы. Паводле вынікаў апытання апублікавалі артыкул - у базе медыцынскіх прэпрынтаў. Высветлілася, што часцей за ўсё пацыенты з працяглай каранавіруснай інфекцыяй пакутуюць ад хуткай стамляльнасці (больш за 77 працэнтаў) і кагнітыўнай дысфункцыі (блізу 55 адсоткаў). Сярод удзельнікаў даследавання пераважалі жанчыны (78,9 адсотка) старэйшыя за сорак гадоў.

Аднак пакуль няма адказу на галоўнае пытанне: якая доля такіх хворых сярод усіх што сутыкнуліся з каранавірусам. Бо Дэвіс і аднадумцы займаліся толькі тымі, у каго быў працяглы ковід.

Паводле звестак даследавання пацыентаў, сярод яго ўдзельнікаў з зацяжным ковідам пераважалі людзі ва ўзросце ад 30 да 49 гадоў. Амаль палова з іх не здавала ПЦР-тэст на SARS-CoV-2. Хваробу ў іх дыягнаставалі па сімптомах.

І вось у пачатку студзеня кітайскія навукоўцы нарэшце ўнеслі яснасць: зацяжная форма COVID-19 характэрная для 76 адсоткаў пацыентаў, у якіх хваробу першапачаткова дыягнаставалі па ПЦР-тэсту.

У даследаванні ўдзельнічалі больш за 1700 чалавек з кітайскага горада Ухань. Амаль усіх новы каранавірус зачапіў паміж студзенем і траўнем 2020-га. У сярэднім праз паўгода пасля выпіскі са шпіталя ў 63 адсоткаў захоўвалася стамляльнасць або цягліцавая слабасць, а 26 адсоткаў зведвалі праблемы са сном.