У Светлагорску рыбакі ратаваліся ад ваўкоў на дрэвах

Як правільна паводзіць сябе ў такой сітуацыі.

Двое рыбакоў са Светлагорску нечакана сустрэліся з драпежнікамі. Мужчынам давялося забрацца на дрэвы і выклікаць дапамогу. Даведаліся, як паводзіць сябе ў такой сітуацыі, піша gomel.today.

19 студзеня два жыхары Светлагорска, Аляксандр і Віталь, адправіліся на рыбалку. Месца выбралі ціхае, далей ад людзей - Белагорскае старарэчча ў заказніку «Выдрыца». Расставілі жэрліцы і сталі назіраць за тым, як клюе.

Бліжэй да поўдня рыбакі заўважылі непадалёк ваўка.

- Неўзабаве з'явіліся яшчэ тры драпежнікі, - успамінае Аляксандр. - Зграя прайшла ўбаку і знікла ў хмызняку. Праз паўгадзіны ваўкі вярнуліся, але цяпер іх было шэсць. Адлегласць да іх была не большай за 100 метраў. Адзін воўк накіраваўся да нас, астатнія сталі разыходзіцца па баках.

Нервы ў мужчын не вытрымалі. Аляксандр, які ў гэты час размаўляў праз тэлефон з жонкай, папрасіў яе звязацца з МНС. Пасля гэтага сябры пабеглі на бераг і залезлі на дрэвы, а ваўкі схаваліся ў хмызняку на процілеглым беразе старарэчча.

Інфармацыя ад аператыўнага дзяжурнага РАНС паступіла дырэктару Светлагорскага БТПР Віктару Лапею. На ягоны загад да месца здарэння выехалі тры паляўнічыя. Калі яны прыбылі ў заказнік, Аляксандр і Віталь паказалі ім кірунак, куды сышлі драпежнікі. Егеры абследавалі тэрыторыю і прайшлі па слядах ваўкоў. Зграя сышла ў бок Жлобінскага раёна, пераследаваць яе не было магчымасці.

- У ваўкоў цяпер гон, яны збіраюцца ў зграі, - кажа дырэктар Светлагорскага РГА ТПР Віктар Лапей. - Пры сустрэчы з драпежнікамі ні ў якім разе нельга паказваць свой страх, мітусіцца, уцякаць. Наадварот, трэба праявіць агрэсіўнасць. Стаць у поўны рост, махаць рукамі ці палкай, крычаць. Дзікія жывёліны генетычна баяцца людзей і першымі не нападаюць.

У Светлагорскім РАНС адзначылі, што ў гэтым выпадку рыбакі паступілі правільна, паведаміўшы пра здарэнне.