Тэрмін увядзення біяметрычных дакументаў у Беларусі зноў перанеслі

Меркавалася, што ID-пашпарты будуць уведзеныя ўжо 30 красавіка.

Увядзенне біяметрычных дакументаў у Беларусі перанеслі з 30 красавіка на больш позні тэрмін.

Пра гэта паведаміў міністр унутраных спраў Іван Кубракоў пасля сустрэчы з Аляксандрам Лукашэнкам, піша сайт "Белорусы и рынок".

"Мы прапанавалі, каб гэта было спакойна для насельніцтва. Тым больш праблемы ніякай няма: усе пашпарты, якія знаходзяцца ў насельніцтва, сапраўдныя да тэрміну заканчэння іх дзеяння (нават нягледзячы на тое, што будуць уведзеныя біяметрычныя дакументы)", - паведаміў Кубракоў.

Падчас нарады Лукашэнка выказаў сумненні ў неабходнасці "імгненнага" ўвядзення біяметрычных дакументаў. "Ці не створым ці мы перашкод для рэалізацыі грамадзянамі сваіх правоў, ці забяспечым ахову іх персанальных звестак? Гэта мяне больш за ўсё насцярожвае... Ці не атрымаецца, што мы нахамуталі яшчэ адну праблему, па-народнаму кажучы? Ці трэба ўводзіць біяметрычныя дакументы імгненна, як прапануецца, з 30 красавіка ці патрабуецца яшчэ час для падрыхтоўкі? Усе пытанні трэба старанна адпрацаваць да пачатку выдачы новых дакументаў", - заявіў ён.