Як кіроўца паставіў на месца ДАІ

Беларус змог аспрэчыць штраф з камеры хуткасці на трасе М6.

Гарадзенец змог давесці сваю невінаватасць і ануляваць штраф з камеры хуткасці, якая нібыта зафіксавала яго парушэнне 15 студзеня на трасе М6. Аляксандр распавёў сваю гісторыю і хоча дапамагчы іншым кіроўцам, піша tut.by.

- 15 студзеня ехаў трасай М6. У Шчучынскім раёне на 197-м кіламетры на мой аўтамабіль спрацавала ўспышка камеры фіксацыі хуткасці. Я здзівіўся, бо за знакамі сачу. Так, хуткасць была блізу 120 км/г, але так было дазволена, - кажа Аляксандр.

Мужчына развярнуўся ў найбліжэйшым дазволеным месцы і вярнуўся, каб пераправерыць сябе. На ўсялякі выпадак уключыў камеру на тэлефоне. Гэта яму і дапамагло ў далейшым.

- Нядаўна мне прыйшоў так званы ліст шчасця. У ім указаная мая хуткасць 121 км/г, пры нібыта дазволеных 100 км/г. І штраф - 58 рублёў, - тлумачыць Аляксандр.

Ён схадзіў у Дзяржаўтаінспекцыю, паказаў пастанову з камеры і відэазапіс.

- У ДАІ мне сказалі, што я не першы звяртаюся наконт гэтай камеры. Я так зразумеў, што ўсе астатнія кіроўцы былі без відэа, без довадаў і адправіліся плаціць штраф. Мне ж паабяцалі патэлефанаваць і штраф ануляваць. Атрымліваецца, налада камеры не адпавядае знаку. А колькі дзён гэта прадаўжалася - невядома. Калі вы апынуліся ў такой сітуацыі, можаце смела карыстацца маім відэа ад 15 студзеня і пісаць заяву ў ДАІ, - дапоўніў кіроўца.