Аднаўляльная энэргетыка ў Еўропе перавысіла генерацыю з выкапнёвага паліва

Упершыню ў гісторыі.

Доля аднаўляльных крыніц энэргіі ў генерацыі электрычнасці ў Еўропе ў 2020 годзе ўпершыню ў гісторыі перавысіла долю выкапнёвага паліва.

Пра гэта гаворыцца ў штогадовай справаздачы брытанскага аналітычнага цэнтра Ember і нямецкага інстытута Agora Energiewende, паведамляе «Интерфакс».

Так, у 2020 годзе з аднаўляльных крыніц было згенеравана 38% усёй электраэнэргіі, а з дапамогай выкапнёвага паліва - 37%.

Гэты зрух абумоўлены пашырэннем выкарыстання энэргіі, якую атрымліваюць ад ветру і сонца, аб'ёмы якой амаль падвоіліся з 2015 года. Да 2020 года пятая частка электраэнэргіі ў краінах ЕЗ была выпрацавана на ветравых і сонечных электрастанцыях, гаворыцца ў справаздачы.

Гэта таксама адна з прычын, чаму вытворчасць энэргіі на аснове вугалю знізілася на 20% летась - вугальныя станцыі забяспечылі толькі 13% электраэнэргіі, выпрацаванай у Еўропе.

«Еўропа абапіраецца на ветравую і сонечную энэргію, каб забяспечыць не толькі паэтапную адмову ад вугалю да 2030 года, але таксама паступова адмовіцца ад газавай генерацыі, замяніць атамныя электрастанцыі, а таксама задаволіць попыт на электраэнэргію для электрамабіляў, цеплавых помпаў і электралізераў», - заявіў старэйшы аналітык Ember і вядучы аўтар справаздачы Дэйв Джонс.

Самыя высокія долі выпрацоўкі ветравой і сонечнай энэргіі зафіксаваныя ў Даніі (61%), Ірландыі (35%), Нямеччыны (33%) і Гішпаніі (29%).

Пандэмія каранавіруснай інфекцыі COVID-19 прывяла да зніжэння попыту на электраэнэргію ва ўсім свеце. У Еўразвязе электраспажыванне ў 2020 годзе ўпала на 4%. Аднак, на думку аўтараў даследавання, пандэмія не паўплывала на развіццё аднаўляльнай энэргетыкі.