Прэм'ер-міністр Італіі падаў у адстаўку
4- 26.01.2021, 15:43
- 9,170
Прэзідэнт краіны пачне кансультацыі з партыямі ў парламенце, каб знайсці новую кіроўную большасць.
Прэзідэнт Італіі Серджо Матарэла ў аўторак пацвердзіў адстаўку прэм'ер-міністра Джузэпэ Контэ.
Пра гэта гаворыцца ў афіцыйным паведамленні на сайце італійскага прэзідэнта, піша Еўрапейская праўда.
Раней паведамлялася, што Контэ адправіўся да прэзідэнта падаць сваю заяву аб адстаўцы, адначасова спадзеючыся на стварэнне новай кааліцыі і аднаўленне большасці ў парламенце.
"Прэзідэнт рэспублікі Серджо Матарэла прыняў сёння раніцай у Квірынальскім палацы кіраўніка Рады міністраў Джузэпэ Контэ, які падаў у адстаўку з урада, які ён узначальваў", - гаворыцца ў паведамленні.
Адзначаецца, што прэзідэнт "пакінуў за сабой права прымаць пастановы і прапанаваў ураду застацца на пасадзе для развязання бягучых спраў".
Разам з тым з 27 студзеня Матарэла пачне палітычныя кансультацыі з партыямі ў парламенце, каб высветліць, ці ўдасца знайсці новую кіроўную большасць. Магчымыя сцэнары ўключаюць ўрад пры новым прэм'ер-міністры або новую кааліцыю на чале з Контэ.
У аўторак раніцай Контэ правёў пасяджэнне кабінета міністраў, каб праінфармаваць урад аб сваіх намерах адстаўкі.
Контэ здолеў пазбегнуць абвяшчэння двух вотумаў недаверу ягонаму ўраду ў парламенце на мінулым тыдні, але страціў абсалютную большасць у Сэнаце пасля таго, як яго хаўруснік і былы прэм'ер-міністр Матэа Рэнца выйшаў з кааліцыі.
Рэнца і Контэ не змаглі дамовіцца аб тым, як лепш выкарыстоўваць сродкі ЕЗ, накіраваныя ў Італію, каб дапамагчы ёй пераадолець эканамічныя ўзрушэнні, выкліканыя пандэміяй каранавіруса.