Здабыча сыравіны ў Расеі абрынулася рэкордна з 1994 года

Сыравінная эканоміка Расеі ў 2020 годзе перажыла інфаркт.

Сыравінная эканоміка Расеі пасля двух дзесяцігоддзяў нарошчвання «цягліц» у 2020 годзе перажыла інфаркт.

Паводле вынікаў года здабыча сыравіны ў краіне ўпала на 7%, паведаміў Расстат у справаздачы аб прамвытворчасці.

Пандэмія абрынула попыт практычна на ўсе тыпы сыравінных тавараў, якія здабываюцца з расейскіх нетраў, паведамляецца finanz.ru.

Здабыча нафты скарацілася на 8,7% і стала мінімальнай за 10 гадоў (512,7 млн тон). Здабыча газу асела на 7% і абнавіла 11-гадовы мінімум (599 млрд кубаметраў).

Уніз пакацілася нават вытворчасць жвіру і пяску (-6,5% і 9,3% адпаведна), а агульны спад здабычы «іншых карысных выкапняў» дасягнуў 15,4%.

Невялікі рост здабычы металічных руд - на 2,1% - быў не ў стане выправіць агульную карціну.

Сумарны спад у сектары карысных выкапняў стаў рэкордным з 1994 года, адзначае былая галоўная эканамістка Nordea ў Расеі Таццяна Еўдакімава. Толькі ў першыя постсавецкія гады - з гіперінфляцыяй, збядненнем і крывавымі войнамі за актывы - сыравінная эканоміка дрыжала мацней.

Крыніца: @Tatiana_Evd

Правал даходаў ад сыравіннай рэнты быў яшчэ глыбейшы, бо разам з попытам рэзка ўпалі кошты.

Выручка ад экспарту нафты абрынулася на 41%, да 72,2 млрд даляраў. Экспарт нафтапрадуктаў прынёс на траціну менш, чым годам раней - 44,4 млрд даляраў (звесткі ЦБ РФ).

Экспартны даход «Газпраму» сціснуўся на 40% і стаў мінімальным за 16 гадоў - 25,1 млрд даляраў.

Аб'ём валютнага даходу, які паступіў ў краіну ад экспарту вуглевадародаў, абрынуўся на 38% і стаў мінімальным з 2005 года - 238,9 млрд даляраў.

Усе экспартныя даходы эканомікі ўпалі на 22%, да 329,5 млрд даляраў, і абнавілі 4-гадовы мінімум.

Сітуацыя магла быць яшчэ горшай, калі б, як у часы Іосіфа Сталіна, не пачаўся ўзмоцнены вываз золата і збожжа.

Сельгасэкспарт узляцеў на 15% у фізічных аб'ёмах і 4% - у грашовым. Продажы золата за мяжу падскочылі ў 5 разоў у пераліку на зліткі і ў 6 разоў у суме ўгод, падлічылі экспэрты РАНХіГС.

Ампутацыя сыравіннай рэнты цяжка траўмавала расейскі бюджэт, пакінуўшы «дзірку» сумаю 3,8% ВУП.

Паводле вынікаў года аб'ём нафтагазавых даходаў федэральнай казны скараціўся на 34%, да 5,235 трлн. У грашовым выразе ўрад недаатрымаў 2,689 трыльёна рублёў - тры гадавыя бюджэты ўсёй сістэмы вышэйшай адукацыі ў краіне.

У суадносінах з памерам эканомікі - менш за 5% ВУП - нафтагазавыя даходы сталі мінімальнымі за ўвесь час даступнай статыстыкі.