Падаражаюць многія прадукты і лекі, абновяць базу «дармаедаў»: галоўныя змены лютага

Чаго чакаць беларусам ад другога месяца зімы?

У лютым беларусы атрымаюць пацяжэлыя рахункі за жыллёва-камунальныя паслугі. У наступным месяцы павінны падаражэць шматлікія лекі, дзіцячыя тавары, прадукты (на асобныя тавары ўжо пачалі расці кошты ў студзені). У лютым таксама абновяць «дармаедскую базу», а таксама вырастуць кошты некаторых цыгарэт.

Партал tut.by склаў падборку лютаўскіх змяненняў, якія могуць паўплываць на таўшчыню партманэтаў беларусаў у лютым.

Беларусы атрымаюць пацяжэлыя рахункі

З 1 студзеня ў Беларусі паднялі тарыфы на многія жыллёва-камунальныя паслугі. З пачатку года падаражэлі паслугі тэхабслугоўвання і капрамонту жылых дамоў, газа-, электра- і водазабеспячэння, водаадвядзення, вывазу камунальных адкідаў, тэхабслугоўванне ліфта, запорна-перагаворных прылад, санітарнага ўтрымання дапаможных памяшканняў шматкватэрнага жылога дома, памеры кампенсацыі выдаткаў на электраэнэргію.

Адпаведна ў лютым беларусы атрымаюць пацяжэлыя рахункі за студзень праз рост тарыфаў, а таксама, хутчэй за ўсё, праз узрослыя выдаткі на ацяпленне праз моцныя маразы.

Падаражаюць шматлікія лекі, прадукты, дзіцячыя тавары

Мы ўжо пісалі, што на лекі, медычныя вырабы, прадукты і дзіцячыя тавары ў найбліжэйшым часам могуць прыкметна вырасці кошты (на некаторыя ўжо выраслі). Прычына - з 1 студзеня ўлады паднялі стаўкі ПДВ пры ўвозе і продажы на многія тавары. Мяркуючы з рэакцыі рынку, рост падаткаў ляжа на пакупнікоў: у некаторых выпадках часткова, у іншых - цалкам. Крамы дзіцячага адзення ўжо падвышаюць цэны на тавары, а аптэкі - на лекі з новых партый з новым ПДВ. Як мінімум некаторыя медцэнтры рыхтуюцца з лютага павялічыць кошты.

А гандлёвыя сеткі атрымліваюць ад аптавікоў прадукты з падвышаным падаткам, прычым гаворка ідзе пра многія тавары - ад аўсянкі і грэчкі да мукі і кансервацыі накшталт кукурузы і гарошку. Прычым ПДВ паднялі як на імпартныя, так і на айчынныя тавары. Да 1 лютага ўсе раздробныя кошты ў абавязковым парадку павінны прывесці ў парадак з улікам новых ставак ПДВ.

З 1 студзеня скарацілі спіс харчовых тавараў, на якія дзейнічае стаўка ПДВ на 10% пры ўвозе і (або) рэалізацыі ў Беларусі. А на тыя пазіцыі, якія выключылі, будзе дзейнічаць падатак на 20%. Пры гэтым пералік прадуктаў, на якія паднялі ПДВ, вельмі вялікі. Сярод іншага падвысілі ПДВ на некаторыя кандытарскія вырабы, у тым ліку на печыва, вафлі.

Таксама ўзнялі ПДВ з 10 да 20% на кансервацыю - агароднінную, фруктовую, таматавую, рыбную. Сярод іншага гэта кансерваваныя аліўкі, грыбы, многая гародніна (у тым ліку кукуруза, гарошак), ягады (да прыкладу, вішня, чарэшня), квашаная капуста, джэмы, жэле, мармелады, фруктовыя пюрэ, арахіс, арахісавы алей, пражаныя арэхі , сокі. Таксама ўзнялі ПДВ на натуральны мёд, марскія водарасці, маргарын. І гэта далёка не поўны спіс прадуктаў, на якія павялічылі падатак.

Падатак з 10 да 20% аптавікі паднялі і на многія крупы (грэчка, проса, пярлоўка, сачавіца), і на муку (цельнамеленую аўсяную, грачаную, кукурузную, жытнюю).

Абновяць «дармаедскую» базу

У лютым чыноўнікі актуалізуюць базу не занятага ў эканоміцы насельніцтва. Тым, хто трапіць у яго, і ў каго ёсць ва ўласнасці жыллё, давядзецца аплачваць поўнымі тарыфамі гарачае водазабеспячэнне.

Нагадаем, базу абнаўляюць штоквартальна. Дакументы, якія пацвярджаюць працу або навучанне за мяжой, трэба падаць у камісію каардынацыі работы пры спрыянні занятасці да 21 кастрычніка, 21 студзеня, 21 траўня і 21 ліпеня адпаведна.

У «дармаедскую» базу ўключылі жаўнераў тэрміновай службы і студэнтаў.

Планавалася, што дармаеды з кастрычніка 2019 года будуць поўнасцю аплачваць ацяпленне і газ. Аднак улады перанеслі гэты тэрмін на 1 траўня 2020 года, а затым - яшчэ на год.

Тым часам чыноўнікі склалі графік працы такіх камісій на гэты год.

Вырастуць кошты некаторых цыгарэт

З 1 лютага падаражэюць пэўныя маркі цыгарэт. Гаворка як пра імпартныя, так і пра айчынныя. На некаторыя цыгарэты прыбаўка складзе 10 капеек. Таксама ў продажы з'явяцца новыя маркі.