Сястра Рамана Бандарэнкі: Шмат якія здагадкі пацвердзіліся

Вольга Кучарэнка гатовая зірнуць у вочы бацькам забойцаў.

Вольга Кучарэнка, сястра Рамана Бандарэнка, які памёр ад траўмаў у шпіталі пасля збіцця 11 лістапада на «Плошчы Перамен», затрымання і РУУС, пракаментавала для «Радыё Свабода» расследаванне, якое апублікавала ініцыятыва BYPOL, а таксама апублікавала допіс у Instagram.

- Само расследаванне для мяне вялікая навіна. Шмат што з таго, што там апублікавалі, было нам часткова вядома. Дзесьці даходзілі чуткі, хтосьці паведамляў. Пра многія нюансы пацвердзіліся мае здагадкі. Самае галоўнае, чаго я чакала - убачыць гэтыя твары, хто там быў. Пра некаторых, як я ўжо казала, здагадвалася, але хтосьці стаў навіной. Гэтыя вядомыя асобы.

Эмоцыі змешаныя. Мы чакаем рэакцыі Генпракуратуры, таму што там неаспрэчныя довады, што смерць была гвалтоўная. Я думаю, што калі яны самі былі не ў стане распазнаць гэта, то дзякуючы гэтаму расследаванню, яны зробяць нейкія крокі, каб распачаць крымінальную справу і пачынаць больш сур'ёзнае расследаванне.

Я спадзяюся, што яны зробяць гэты крок - распачынанне крымінальнай справы. Таму што як можна не прыняць да ўвагі, што смерць адбылася гвалтоўным шляхам? І сказаць, што мы не заводзім крымінальную справу. Гэта неяк дзіўна. Гэта як плявок у твар усяму беларускаму народу. Таму што людзі страту майго брата ўспрымалі як сваю асабістую.

Тут неаспрэчныя довады. Упартасць не распачынаць крымінальную справу - гэта смешна, - сказала Вольга ў відэа.

Акрамя таго, яна апублікавала допіс у Instagram:

- Чым далей, тым больш адкрываецца праўды. І, я ўпэўненая, што яшчэ шмат чаго іншага ўсплыве. Адно немагчыма ніяк прыняць. Забіты мой БРАТ! Нейкія людзі вызначаюць, што ім дазволена пазбаўляць жыцця іншага чалавека. Гэта жыццё чалавека!

ЖЫЦЦЁ!!!

Няўжо з думкай, што ты злачынец, забойца, памагаты забойства магчыма спакойна жыць!? Я не хачу бачыць гэтых людзей. Але я б з задавальненнем глянула ў вочы іх бацькам!