Рабаўнікі ў Францыі закідалі паліцыю бутэлькамі віна на €350 тысяч

Зламыснікі скралі віно ў шыкоўным гатэлі.

Група людзей скрала бутэлькі бургундскага віна на 350 тысяч еўраў з раскошнага гатэля паблізу горада Бона, рэгіён Бургундыя, за 2 гадзіны язды ад Парыжа. Яны закідвалі паліцыю бутэлькамі, калі за імі пачалася пагоня.

Як піша hromadske.ua са спасылкай на The Guardian, інцыдэнт адбыўся раніцай 5 студзеня.

Рабаўнікі прыехалі ў раскошны гатэль Relais Château, які займае 80 гектараў сельскай мясцовасці, а таксама аточаны лясамі і палямі. Яны ўзламалі дзверы віннага склепа і вынеслі сотні бутэлек бургундскага віна.

Уладальнік гатэля распавёў, што спрацавала пажарная сігналізацыя. Тады ён заскочыў у сваё аўто і дагнаў фургон, перад тым, як рабаўнікі павінны былі выехаць на аўтастраду.

Пасля да пагоні далучыліся паліцыянты. Калі яны наблізіліся да фургона, у іх пачалі кідаць бутэлькі віна. Праваахоўнікі сцвярджаюць, што ніхто не пацярпеў. З іх слоў, бутэлькамі цалялі ў лабавую шыбу, але яны не патрапілі ў цэль.

Рабаўнікоў затрымаць не ўдалося. Яны рэзнуліся ў дарожную агароджу і зніклі з аўтамабіля. Цяпер ідзе расследаванне інцыдэнту, паліцыя шукае, прынамсі, тры асобы.

У паліцыі таксама кажуць, што гэты гатэль пацярпеў ад нападу рабаўнікоў двойчы за два дні. За дзень да гэтай гісторыі да віннага склепа ўварваліся невядомыя і выкралі віна на 200 тысяч еўраў - тады сігналізацыя не спрацавала. Паліцыя спрабуе высветліць, ці адна банда арганізавала абодва крадзяжы.

Першыя вінаграднікі з'явіліся ў Бургундыі яшчэ да нашай эры. А цяпер вінаграднікі гэтага рэгіёну нават унеслі ў пералік аб'ектаў Сусветнай спадчыны ЮНЭСКА.