Снегапад: на дарогах краіны заторы, ДТЗ, камунальнікі працуюць ва ўзмоцненым рэжыме

Да выпадзення ў Беларусі снегу шмат хто стаўся не гатовым.

На дарогах адбываюцца ДТЗ: кіроўцы не спраўляюцца з кіраваннем аўтамабіляў. Паводле прагнозаў, снегапад спыніцца толькі да вечара суботы. ДАІ і камунальнікі працуюць ва ўзмоцненым рэжыме, піша tut.by.

Учора ў Беларусі прайшлі моцныя снегапады, сёння, 8 студзеня, у многіх раёнах краіны, паводле прагнозаў, - моцны снег. Сіноптыкі абвясцілі аранжавы ўзровень небяспекі.

Камунальнікі працуюць ва ўзмоцненым рэжыме, паведамляе тэлеграм-канал «Мінск. Афіцыйна». У папярэднія дні ў Менску снегаўборачная тэхніка працавала без перапынкаў. На вуліцы сталіцы вывелі больш за 620 адзінак снегаўборачнай тэхнікі, на прыпынках, пераходах працавалі блізу 650 рабочых.

У Гаррэмаўтадары заявілі, што пра снегапад ведалі і былі да яго гатовыя, усе раённыя аўтадара арганізавалі калоны для прыборкі снегу. Камунальнікі адпрацавалі асноўныя маршруты. Паводле прагнозаў, снегапад спыніцца да вечара суботы, таму ўборка прадоўжыцца.

Нягледзячы на намаганні камунальнікаў, у сталіцы адбываюцца ДТЗ. З паведамленняў ДАІ Менска, раніцай 8 студзеня на вуліцы Чыгуначнай дзве аварыі былі зафіксаваныя з розніцай у пяць хвілін.

Блізу 7.15 28-гадовы кіроўца Volkswagen Transporter ехаў па пуцеправодзе з боку вуліцы Суражскай у бок вуліцы Чыгуначнай, пры выбары хуткасці не ўлічыў дарожныя, пагодныя (метэаралагічныя) умовы, не справіўся з кіраваннем і ўчыніў наезд на асвятляльную мачту. У выніку ДТЗ кіроўца і 23-гадовы пасажыр былі дастаўленыя ў лякарню для агляду.

Праз некалькі хвілін 25-гадовы кіроўца Volkswagen Polo на гэтым жа адцінку дарогі не справіўся з кіраваннем, выехаў за межы праезнай часткі і наехаў на двух чалавек, якія стаялі на прыпынку. Адзін з іх - 54-гадовы мужчына - атрымаў траўмы і быў дастаўлены ва ўстанову аховы здароўя. Другі пешаход не пацярпеў.

Яшчэ аб адным паведамілі відавочцы. Адбылося яно на скрыжаванні Арлоўскай і праспекта Пераможцаў. Машына ДАІ вылецела з сустрэчнай паласы праз паркан проста ў лоб Renault Arkana. Усе людзі цэлыя.

Праблемы з рухам ёсць і за межамі сталіцы. Аб велізарным заторы на трасе М6 каля Валожына ў бок Менска паведамілі ў тэлеграм-канале «АўтаГродна». Аўтамабілі стаяць ужо больш за гадзіну, наперадзе з кювета спрабуюць дастаць фуру.

- Фура ляжыць у кювеце ўжо даўно, але дастаць наважылі толькі цяпер. Арганізацыя ніякая, дзясяткі машын у чарзе не рухаюцца ўжо гадзіну, - напісаў сведка.

ДАІ нагадвае, пры выбары хуткасці руху кіроўца павінен улічваць абмежаванні хуткасці, а таксама інтэнсіўнасць руху, агляднасць дарогі, асаблівасці і стан транспартнага сродку і грузаў, дарожныя, пагодныя (метэаралагічныя) умовы і іншыя фактары, якія зніжаюць празрыстасць атмасферы і ўплываюць на бачнасць дарогі ў кірунку руху.

Кіроўцам варта пазбягаць рэзкага перабудавання і тармажэння, а таксама адмовіцца ад абгонаў, захоўваць дыстанцыю і хуткасны рэжым. Для прыцягнення ўвагі ва ўмовах недастатковай бачнасці дарогі рэкамендуецца рухацца з уключаным блізкім святлом фар або дзённымі хадавымі агнямі.

Пры яздзе ў галалёд нават на невялікай хуткасці недапушчальныя рэзкасць у рухах ні пры пераключэнні перадач, ні пры разгоне, ні пры манеўраванні. Асабліва небяспечны галалёд на мастах, эстакадах, высокіх насыпах, а таксама на пад'ездах да прыпынкаў грамадскага транспарту, скрыжаваннях і пераходах. Лёд тут утвараецца нярэдка нават тады, калі яго няма на астатніх адцінках дарогі. Тармазіць на такіх адрэзках вельмі небяспечна.

У сувязі з багатым снегападам і ўтварэннем наледзі на праезнай частцы ДАІ нясе службу ва ўзмоцненым варыянце, кантралюючы ўборку вулічна-дарожнай сеткі, а таксама суправаджаючы калоны снегаўборачнай тэхнікі.

Уладальнікам не варта пакідаць свае аўтамашыны на краі праезнай часткі на доўгі час, каб не перашкаджаць рабоце камунальнай і снегаўборачнай тэхнікі.