Ангела Меркель: У Нямеччыне прышчэпленыя ўжо сотні тысячаў чалавек

Канцлерка Нямеччыны ўпэўненая, што тэмпы вакцынацыі будуць толькі расці.

Канцлерка Нямеччыны Ангела Меркель (Angela Merkel) упэўненая ў тым, што тэмпы вакцынацыі ад каранавірусу, якая пачалася ў краіне ў канцы снежня 2020 года, будуць толькі расці. Пра гэта палітык заявіла ў сваім першым падкасце ў 2021 годзе. Ён быў апублікаваны на сайце канцлеркі ў суботу, 9 студзеня, піша сайт dw.com.

«Гэта павольны старт. Але некалькі сотняў тысячаў чалавек ужо прышчэпленыя, і кожны дзень іх становіцца ўсё больш. Тэмпы вакцынацыі будуць нарастаць» – паказала Меркель. Пры гэтым яна падкрэсліла, што ў Нямеччыне хопіць вакцыны для таго, каб зрабіць прышчэпку ўсім ахвотным. Раней, 6 студзеня, міністр аховы здароўя краіны Енс Шпан (Jens Spahn) паабяцаў, што такая магчымасць з'явіцца ва ўсіх жыхароў ФРГ да лета.

У падкасце 9 студзеня Меркель выступіла на абарону адзінай еўрапейскай стратэгіі ў плане закупак і размеркавання вакцынаў. «Вірус, ад якога пакутуюць усе, ні адна краіна не зможа перамагчы самастойна. Ні адна дзяржава, у тым ліку Нямеччына, не будзе надзейна абароненая ад вірусу, пакуль ад яго не будуць абароненыя яе суседзі і сябры», – адзначыла яна.

Рэжым лакдаўна ў Нямеччыне

На думку канцлеркі, найбліжэйшыя тыдні зімы стануць самымі цяжкімі за ўвесь час пандэміі. У сувязі з гэтым яна асабліва падкрэсліла важнасць выканання рэжыму лакдаўну, які будзе дзейнічаць у краіне як мінімум да 31 студзеня. Гэтыя карантынныя абмежаванні яна назвала «суровымі, але неабходнымі».

Мяркуецца, што для забеспячэння масавага імунітэту да той ці іншай інфекцыйнай хваробы, неабходна прышчапіць ад яе сама менш 60 адсоткаў насельніцтва краіны. Згодна з квотамі ЕЗ, ФРГ ужо атрымала 1,3 мільёна дозаў вакцыны ад каранавірусу. Але прышчэпкі зрабілі пакуль толькі 476 959 чалавек. Такія звесткі былі апублікаваныя 8 студзеня на сайце Інстытута імя Роберта Коха (RKI).