24 лютага 2021, Серада, 23:08
Сім сім, Хартыя 97!
Рубрыкі

Маск наважыў распрадаць усю сваю маёмасць дзеля каланізацыі Марса

50
Маск наважыў распрадаць усю сваю маёмасць дзеля каланізацыі Марса

Сузаснавальнік кампаніі SpaceX мяркуе, што насельніцтва Зямлі павінна стаць «касмічнай цывілізацыяй».

Сузаснавальнік касмічнай кампаніі SpaceX і адзін з кіраўнікоў аўтамабільнай кампаніі Tesla Ілан Маск, які стаў самым багатым чалавекам у свеце, наважыў распрадаць усю сваю маёмасць дзеля засялення Марса. Пра свае планы бізнэсовец распавёў амерыканскаму выданню Business Insider (пераклад - «Гордон»).

Прадпрымальнік патлумачыў, што збіраў багацце не дзеля ўласнай матэрыяльнай выгады, а каб выдаткаваць як мага больш грошай на каланізацыю планеты. Будаўніцтва горада на іншай планеце запатрабуе значных фундаванняў. Гэта адна з прычын, якая прымушае яго распрадаваць маёмасць. Іншай прычынай з'яўляецца жаданне прадэманстраваць, наколькі рашуча ён настроены ў сваёй ідэі перасяліць людзей на Марс.

Маск мяркуе, што насельніцтва Зямлі павінна стаць «касмічнай цывілізацыяй і міжпланетным відам». Мультымільярдэр сказаў, што выдасць пазыкі тым, у каго няма грошай адправіцца на Марс, а ў будучыні і працоўныя месцы на планеце.

Са слоў Маска, у яго не застанецца практычна ніякай каштоўнай маёмасці з фінансавага пункту гледжання, акрамя акцый кампаній. Калі на працы напружаная сітуацыя, бізнэсовец аддае перавагу спаць проста на фабрыцы ці ў офісе.

Агенцтва Bloomberg ацаніла актывы Маска на $209,5 млрд. Паводле версіі часопіса Forbes Маск таксама знаходзіцца на першым месцы з багаццем $189,7 млрд.

Звесткі амерыканскай біржы Nasdaq на 8 студзеня сведчаць, што акцыі Tesla падняліся ў кошце да $880. Паводле прагнозаў аналітыкаў, у 2021 годзе кошт акцыі Tesla можа дасягнуць $1 тыс.

Ілан Маск - амерыканскі бізнэсовец і вынаходнік. Заснавальнік, суўладальнік, генеральны дырэктар і галоўны інжынер SpaceX, кампаніі - вытворцы касмічнай тэхнікі. Маск таксама з'яўляецца гендырэктарам і галоўным ідэйным натхняльнікам амерыканскага вытворцы электрамабіляў Tesla.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».