Мяжу Польшчы штурмавалі амаль паўтысячы нелегалаў з боку Беларусі

Новыя звесткі ад памежных структур суседніх краін.

Польскія памежнікі ў сераду, 13 кастрычніка, зафіксавалі 482 спробы незаконнага пераходу мяжы з боку Беларусі. У Латвіі мясцовыя памежнікі ў аўторак, 12 кастрычніка, не пусцілі 23 нелегальных мігрантаў. Новыя звесткі прыводзяць памежныя службы суседніх краін.

У сераду, 13 кастрычніка, польскія памежнікі зафіксавалі 482 спробы незаконнага пераходу мяжы. 8 мігрантаў затрымалі: гэта 6 грамадзян Ірака і два Ірана. Таксама былі затрыманыя людзі, якія падазраюцца ў дапамозе ў арганізацыі нелегальнага пераходу мяжы. Гэта пяць замежнікаў - грамадзяне Грузіі, Украіны, Сірыі і Іраку, паведамляе польская памежная служба.

Латвійскія памежнікі ў аўторак, 12 кастрычніка, не пусцілі ў краіну 23 чалавекі. Затрыманняў за пазначаны перыяд – не было, паведамляе служба.

Таксама памежнікі суседняй краіны паведамляюць, што на латвійска-беларускай мяжы з 6 кастрычніка пачалося ўзвядзенне загароды. Спачатку пабудуюць 37 кіламетраў часовай агароджы з калючага дроту. Потым - яшчэ 37 кіламетраў, затым - 36.

Усяго ў выніку працягласць загароды павінна скласці 111 кіламетраў. Скончыць яе ўзвядзенне плануюць да пачатку лістапада.