Светлагорскі ЦКК зрабіў шырокі крок да банкруцтва

З вынікаў 2020 года прадпрыемства ўжо ўвайшло ў тройку самых стратных акцыянерных таварыстваў Гомельскай вобласці.

Светлагорскі райвыканкам анансаваў правядзенне грамадскіх абмеркаванняў справаздачы аб ацэнцы ўздзеяння на навакольнае асяроддзе праекта стварэння комплексу дрэваапрацоўчых прадпрыемстваў на тэрыторыі Светлагорскага цэлюлозна-кардоннага камбіната, піша «Флагшток».

Новы інвестыцыйны праект шчыльна звязаны з нашумелым будаўніцтвам завода беленай цэлюлозы, які дагэтуль не змог выйсці на праектныя паказчыкі.

Нагадаем, што пагадненне з кітайскай кампаніяй CAMCE на будаўніцтва ў Светлагорску завода сульфатнай беленай цэлюлозы было дасягнутае яшчэ ў кастрычніку 2010 года. Кошт праекта склаў 800 мільёнаў даляраў, з якіх 85% прыпадалі на кітайскі звязаны крэдыт. Першапачаткова планавалася, што новае прадпрыемства магутнасцю 400 тысяч тон сульфатнай беленай цэлюлозы на год пачне працу ў 2015 годзе. Аднак запуск вытворчасці зацягнуўся, у выніку чаго беларускі бок разарваў кантракт з кітайскімі падрадчыкамі.

Замест чаканых прыбыткаў Светлагорскі ЦКК атрымаў экалагічны скандал. Мясцовыя жыхары пачалі скардзіцца на рэзкі непрыемны пах. Жыхары вёскі Якімава Слабада, каля якой пабудавалі новы завод для вытворчасці беленай цэлюлозы, звярнуліся ў суд з пазовам аб кампенсацыі маральнай і матэрыяльнай шкоды.

У выніку шкодных для здароўя рэчываў у паветры эколагі так і не знайшлі, але запуск вытворчасці зацягнуўся. Упершыню беленую цэлюлозу ў Светлагорску атрымалі толькі ў 2019 годзе. У 2020 годзе было выпушчана 250 тысяч тон, што складае толькі 63% ад вытворчай магутнасці.

Выхад вытворчасці на праектную магутнасць агаліў праблемы са збытам гатовай прадукцыі. У выніку галіновай канцэрн ухваліў ідэю будаўніцтва вытворчасці для выпуску крафтавай паперы з цэлюлозы.

Першапачаткова планавалася, што праект абмяжуецца будаўніцтвам цэха коштам блізу 130 млн еўраў. Аднак з анонсу грамадскага абмеркавання стала вядома, што замест цэха тут пабудуюць комплекс дрэваапрацоўчых прадпрыемстваў, а сума праекта павялічыцца да 600 млн еўраў.

Для прадпрыемства, якое яшчэ не акрыяла ад мінулай мадэрнізацыі, новы праект можа стаць непасільнай ношай. На пачатак 2021 года доўгатэрміновыя абавязанні прадпрыемства складалі больш за 2 млрд рублёў. Неабходнасць абслугоўвання доўгу прыводзіць да вялізных страт. У выніку па выніках 2020 года Светлагорскі ЦКК увайшоў у тройку самых стратных акцыянерных таварыстваў Гомельскай вобласці. Павялічыўшы завінавачанасць амаль удвая, прадпрыемства зробіць шырокі крок да банкруцтва.