У Беларусі стаўкі для банкаўскіх крэдытаў могуць вырасці да канца года
1- 18.10.2021, 15:10
- 3,840
Як і калі можа змяніцца стаўка рэфінансавання.
У Беларусі да канца гэтага года могуць павысіць стаўку рэфінансавання, да якой прывязаныя стаўкі многіх банкаўскіх крэдытаў, прагназуе Еўразійскі банк развіцця. Таксама экспэрты чакаюць, што Нацбанк можа падняць адсоткавую столь у крэдытах, якой прытрымліваюцца банкі. Тым часам чыноўнікі прагназуюць рост стаўкі рэфінансавання ў 2022 годзе, піша zerkalo.io.
Як і калі можа змяніцца стаўка рэфінансавання
У ЕАБР прагназуюць павышэнне ў Беларусі да канца гэтага года стаўкі рэфінансавання. Цяпер стаўка складае 9,25%, апошнім разам яе падвышалі 21 ліпеня. Нагадаем, да гэтага паказчыка прывязаныя многія банкаўскія крэдыты, у тым ліку на нерухомасць. Пры павышэнні гэтай велічыні растуць і адсоткавыя стаўкі ў крэдытах.
У праекце рэспубліканскага бюджэту на 2022 год, паводле нашай інфармацыі, папярэдне закладзеная стаўка рэфінансавання 9,9%.
Адсоткавую столь у крэдытах могуць падняць
У ЕАБР таксама прагназуюць, што Нацбанк да канца гэтага года можа падвысіць разліковыя велічыні стандартнай рызыкі (РВСР). Прасцей кажучы, гэта адсоткавая столь у крэдытах, яе прытрымліваюцца банкі. Цяпер для крэдытаў для фізічных асоб гэты паказчык складае 19,02%, а для юрыдычных асоб - 14,87%. Апошнім разам РВСР павышалі ў жніўні.
Да РВСР у некаторых банках прывязаныя адсоткавыя стаўкі ў крэдытах на нерухомасць і на аўтамабілі на агульных умовах. Гэта значыць, пры павышэнні гэтага паказчыка банкі павінны змяніць адсоткавыя стаўкі ў асобных крэдытах.