4 снежня 2021, Субота, 15:50
Сім сім, Хартыя 97!
Рубрыкі

Што адбываецца з кітайскай вакцынай у Беларусі?

1
Што адбываецца з кітайскай вакцынай у Беларусі?

Пацыенты шукаюць, медыкі чакаюць новую партыю.

Беларусы могуць выбіраць паміж вакцынамі ад COVID-1, распрацаванымі ў Расеі «Спадарожнікам V» і «Спадарожнікам Лайт», а таксама Vero Cell ад кітайскага вытворцы Sinopharm. Мяркуючы з паведамленняў чытачоў, некаторыя імкнуцца прышчапіцца менавіта кітайскай вакцынай і шукаюць яе ў паліклініках. Zerkalo.io распавядае, калі ў Беларусі чакаюць новую партыю і чаму некаторым яна можа не дастацца.

У чым розніца паміж «Спадарожнікам V» і Vero Cell?

Вакцына «Спадарожнік V» заснаваная на выкарыстанні віруснага вектару - адэнавірусу чалавека з убудаваным у яго фрагментам генетычнага матэрыялу SARS-CoV-2. Vero Cell ад Sinopharm - інактываваная вакцына, яна створаная з выкарыстаннем забітага каранавіруса.

«На пытанне, якая вакцына лепшая, не існуе адназначнага адказу. У кожным выпадку, кожная вакцына лепшая, чым адсутнасць вакцынацыі ў прынцыпе, - тлумачыў вядомы лекар-інфекцыяніст Мікіта Салавей. - Калі казаць пра вакцыны, даступныя ў Беларусі, то, напрыклад, «Спадарожнік» мае большую эфектыўнасць (не менш за 92% пры варыянтах дзікага каранавіруса і блізу 84% пры дэльта-варыянце), але часцей дае сістэмныя/лакальныя рэакцыі на яе ўвядзенне. Вакцына Sinopharm валодае меншай эфектыўнасцю, але і рэакцыя на ўвядзенне меншая. Абедзве вакцыны засцерагаюць ад цяжкіх формаў каранавіруснай інфекцыі».

Менчукі шукаюць

Беларусы ўжо больш за тыдзень паведамляюць: кітайская вакцына недаступная ў некаторых менскіх паліклініках. Пры гэтым у іншых менчукоў і жыхароў рэгіёнаў атрымліваецца прышчапіцца Vero Cell без праблем.

Журналісты атрымалі амаль дзясятак пытанняў пра тое, дзе ў Менску знайсці кітайскую вакцыну, гэтае ж пытанне - адно з самых папулярных у тэматычных чатах. Чытачы дзеляцца досведам званкоў у паліклінікі і на гарачыя лініі - і часта знаходзяць вакцыну. «На Экспабеле кітайская ёсць. Чарга з 70-80 чалавек, раніцай запісвалі на лісточак», - напісаў чытач Zerkalo.io.

На сайце Міністэрства аховы здароўя працуе мапа ўсіх пунктаў вакцынацыі ў Беларусі. У кожнага пункта пазначаны адрас і час працы, у некаторых - тэлефоны.

Улады чакаюць новую партыю

Найбліжэйшым часам у Беларусі чакаюць вялікую партыю кітайскай вакцыны.

«Цяпер у абарачэнні ў Беларусі знаходзіцца 800 тысяч доз вакцын, на гэтым тыдні ў краіне чакаецца паступленне яшчэ адной партыі «Спадарожніка V», а на наступным - вялікай партыі кітайскай вакцыны», - гаворыцца ў паведамленні Міністэрства аховы здароўя ад 19 кастрычніка.

Міністэрства не паведамляе, колькі доз будзе ў партыі кітайскай вакцыны і як яны будуць размеркаваныя.

«Даслоўна на днях прыйдзе яшчэ партыя кітайскай вакцыны, так што яе будзе ў дастатковай колькасці», - сказаў 19 кастрычніка старшыня Берасцейскага аблвыканкама Юрый Шулейка. З ягоных слоў, цяпер у вобласці ёсць «Спадарожнік V» і «Спадарожнік Лайт», а Vero Cell «пакідаецца на другую дозу».

Кітайская вакцына - «выключна для вакцынацыі цяжарных»?

У кастрычніку 2021-га Міністэрства аховы здароўя апублікавала рэкамендацыі што да вакцынацыі цяжарных жанчын. 20 кастрычніка ў Менску ўжо прышчапілі першую цяжарную.

У рэкамендацыях Міністэрства аховы здароўя нічога не сказана пра тое, якую з вакцын трэба выкарыстоўваць для будучых мам. Аднак у інструкцыі «Спадарожніка V» цяжарнасць паказаная як супрацьпаказанне для прышчэпкі.

Менавіта кітайская вакцына Vero Cell рэкамендаваная спецыялістамі для імунізацыі будучых маці, сказала агенцтву «Минск-Новости» галоўная лекарка 21-й цэнтральнай раённай паліклінікі Заводскага раёна Наталля Мысліўчык.

Са слоў Мысліўчык, у Менску Vero Cell ужывацьмуць выключна для будучых мам.

«У сталіцы гэты прэпарат паступіць ва ўстановы аховы здароўя выключна для вакцынацыі цяжарных, бо іншыя антыковідныя вакцыны, дазволеныя да ўжывання ў Беларусі, ім не падыходзяць», - піша агенцтва са спасылкай на словы Мысліўчык.

Такая сітуацыя ў Вілейцы. У мясцовай ЦРБ атрымалі 100 доз кітайскай вакцыны, але прышчэпліваць ёй плануюць толькі цяжарных, піша «Рэгіянальная газета». Астатнім ахвотным прапануюць расейскую вакцыну.

Што рабіць, калі пара рабіць другую прышчэпку, а патрэбнай вакцыны няма?

«Зрабілі першую ін'екцыю кітайскай вакцынай, калі прыйшоў па другую, сказалі, што няма. Як такое можа быць?», - паскардзіўся Zerkalo.io чытач з Менска. У гэтага чалавека ўсё скончылася добра: пацыент і медыкі пагаварылі яшчэ раз, і другі кампанент кітайскай вакцыны знайшоўся. Але што рабіць, калі ўжо прышчапіўся першым кампанентам Vero Cell, а другі знайсці не атрымліваецца?

Відавочна, у такой сітуацыі лепш пачакаць, у вас у запасе ёсць чатыры тыдні. «Мінімальны інтэрвал паміж увядзеннем першай і другой дозы інактываванай вакцыны супраць SARS-CoV-2 (КНР) можна павялічыць з 28 да 56 дзён», гаворыцца ў рэкамендацыі Міністэрства аховы здароўя.

А вось што будзе, калі адзін чалавек атрымае два кампаненты розных вакцын, - спецыялісты пакуль не ведаюць. Сусветная арганізацыя аховы здароўя рэкамендуе рабіць прышчэпку ад каранавіруса дзвюма дозамі адной вакцыны, бо наступствы выкарыстання розных вакцын пакуль не вывучаныя.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».