Здольнасць расейцаў ашчаджаць упала да мінімуму з 2014 года

Толькі 1% сваіх даходаў людзі змаглі адкласці сёлета.

Страціўшы 10% сваіх даходаў за 7 гадоў і сутыкнуўшыся з імклівым паскарэннем інфляцыі, расейскія спажыўцы практычна перасталі ашчаджаць.

Узровень ашчаднасці насельніцтва ў Расеі апусціўся да 1% - такую дзель сваіх даходаў людзі змаглі адкласці сёлета, падлічылі аналітыкі ING, перадае finanz.ru.

У параўнанні з мінулым годам узровень ашчаднасці сцяўся больш чым у чатыры разы і блізкі да гістарычнага мінімуму - менш расейцы ашчаджалі толькі на фоне выбуховай дэвальвацыі ў 2014 годзе.

Аб'ёмы спажывання ў эканоміцы растуць: раздробны продаж, згодна з Росстат, дадаў 5,3% у жніўні. Але ўсе дадатковыя выдаткаваныя грошы - гэта альбо крэдыты, альбо выплаты сацыяльнай дапамогі з бюджэту, адзначае Максім Петраневіч, старшы эканаміст «Открытие Research».

У ліпені-жніўні сацыяльныя выплаты выраслі на 1,044 трыльёна расейскіх рублёў у параўнанні з аналагічным перыядам 2019 года, яшчэ 109 млрд рублёў дадалі банкі за кошт раздробных пазык.

«Выніковая сума 1,1 трлн рублёў дакладна адпавядае прыросту выдаткаў насельніцтва на тавары, паслугі і грамадскае харчаванне», - канстатуе Петраневіч.

І хоць дакладнае супадзенне выпадковае, тэндэнцыя не выклікае сумненняў. Калі ўлічваць толькі рублёвы ашчадак насельніцтва ў банках і адняць з сумы, якую фізічныя асобы вінныя банкавай сістэме, то грошай насельніцтва мае так мала, як не было ніколі за апошнія 12 гадоў.

Толькі 2,3 трыльёна рублёў складаюць чыстыя рублёвыя актывы расейскіх грамадзян на 1 верасня супраць 6,083 трлн на пачатку года і 8,577 трлн у студзені 2018-га.

За апошнія 8 месяцаў чысты ашчадак фізічных асоб сціснуўся ў 2,6 раза, а ў параўнальным вылічэнні стасунак рублёвых укладаў і запазычанасці фізічных асоб перад банкамі абнавіў гістарычны рэкорд - 91,1%. Гэта вышэй, чым на піку крызісаў 2008 і 2014 гадоў: 86,1% і 80,1% адпаведна.