Reuters: NATO ўзгадняе генеральны план абароны ад нападу Расеі на некалькіх франтах

Дыпламаты расказалі аб сакрэтнай стратэгіі стрымлівання РФ.

NATO ўзгадняе генеральны план стрымлівання росту агрэсіі Расеі, піша Reuters са спасылкай на дыпламатаў і крыніцы, знаёмыя з сітуацыяй.

У чацвер, 21 кастрычніка, міністры абароны краін NATO павінны ўзгадніць новы генеральны план абароны ад кожнага патэнцыйнага нападу Расеі на некалькіх франтах.

Стратэгія з'яўляецца канфідэнцыйнай і выходзіць за рамкі існых рэгіянальных планаў абароны. Яна накіраваная на падрыхтоўку да кожнай адначасовай атакі ў Балтыйскім і Чарнаморскім рэгіёнах, магчыма, уключаючы ядзерную зброю, узлом кампутарных сетак або з космасу.

«Афіцыйныя асобы і дыпламаты кажуць, што такі напад не з'яўляецца непазбежным», - гаворыцца ў паведамленні.

Чыноўнік і дыпламаты кажуць, што такі план з'яўляецца неабходным, бо Расея распрацоўвае сучасныя сістэмы зброі і размяшчае войскі і абсталяванне бліжэй да межаў хаўруснікаў.

«Калі ў вас будзе такі буйны канфлікт, ён запатрабуе актыўнасці ва ўсёй зоне аперацый. Адначасова могуць адбыцца розныя падзеі, і гэта сапраўды патрабуе цэласнага планавання», - заявіў высокапастаўлены прадстаўнік урада ЗША.

Са слоў амерыканскага генерала ў адстаўцы Бэна Ходжэса, стратэгічны план можа прывесці да большай узгодненасці ў калектыўнай абароне NATO, што азначае больш рэсурсаў для Чарнаморскага рэгіёну.

Былы высокапастаўлены чыноўнік NATO Джэймі Шы адзначыў, што Расея - гэта непасрэдная пагроза стабільнасці ў свеце.

«Да гэтага часу меркавалася, што Расея - гэта непрыемнасць, але не непасрэдная пагроза. Але расейцы робяць некаторыя трывожныя рэчы, яны практыкуюцца ў робататэхніцы, а гіпергукавыя крылатыя ракеты могуць быць сапраўды вельмі разбуральнымі», - дадаў ён.

Некалькі дзён назад стала вядома, што з 1 лістапада Расея прыпыняе працу свайго пастаяннага прадстаўніцтва пры NATO.