27 студзеня 2022, Чацвер, 21:14
Сім сім, Хартыя 97!
Рубрыкі

Сталі вядомыя падрабязнасці няшчаснага выпадку на здымках фільма з Алекам Болдуінам

25
Сталі вядомыя падрабязнасці няшчаснага выпадку на здымках фільма з Алекам Болдуінам

Папулярны галівудскі акцёр пракаментаваў гібель аператаркі.

Аператарка Галіна Хатчынс, грамадзянка Украіны, загінула на здымках вестэрна "Раст" каля горада Санта-Фэ (штат Нью-Мексіка), у яе выпадкова стрэліў прадзюсар і выканаўца галоўнай ролі ў стужцы – папулярны галівудскі акцёр Алек Болдуін. Пацярпеў таксама рэжысёр фільма Джоэл Соуз, паведамляе ВВС.

Прадстаўнік кампаніі, якая вядзе здымкі фільма, паведаміў выданню The Hollywood Reporter, што інцыдэнт адбыўся падчас здымак сцэны, у якой Болдуін павінен быў страляць халастымі патронамі. Зброя выкарыстоўвалася на пляцоўцы як прадмет рэквізіту.

"Як кажуць следчыя, падобна, што ў сцэне, якая ў гэты момант здымалася, павінен быў выкарыстоўвацца пісталет, – цытуе Франс-прэс паведамленне паліцыі. – Дэтэктывы спрабуюць вызначыць, якім менавіта паражальным элементам быў выраблены стрэл".

"Няма словаў, каб апісаць маё ўзрушэнне і мой смутак у сувязі з трагічным інцыдэнтам, які забраў жыццё Галіны Хатчынс – маці, жонкі і нашай глыбокапаважанай калегі. Я цалкам супрацоўнічаю з паліцэйскім расследаваннем, каб вызначыць, як адбылася гэтая трагедыя. Я падтрымліваю кантакт з яе мужам і прапаную сваю падтрымку яму і ягонай сям'і", – напісаў Болдуін ў "Твітэры".

Акцёр дадаў, што ягонае сэрца разбітае і ён вельмі перажывае за мужа і сына Галіны, а таксама за ўсіх яе блізкіх і сяброў.

Хатчынс, якой было 42 гады, адправілі ў лякарню на гелікоптары, аднак яна памерла. 48-гадовы Соуз быў дастаўлены ў лякарню на машыне хуткай дапамогі. Амерыканская акторка Фрэнсіс Фішэр, якая ўдзельнічае ў здымках, напісала ў "Твітэры", што яго ўжо выпісалі з лякарні, хоць раней паведамлялася, што Соуз быў у рэанімацыі. "Наш рэжысёр Джоэл Соуз выпісаны з лякарні", – напісала акторка.

Журналістка Тэса Ментус апублікавала ў сваім "Твітэры" фатаграфіі, зробленыя падчас здымак. Інцыдэнт адбыўся на ранча Бананза Крык непадалёк ад Санта-Фэ, дзе часта здымаюцца галівудскія фільмы.

"Болдуін даў паказанні паліцыянтам, – сказаў афіцыйны прадстаўнік шэрыфа Санта-Фэ агенцтву Франс-прэс. – Ён зрабіў заявы і адказаў на іх пытанні. Ён прыйшоў добраахвотна і пасля давання паказанняў пакінуў будынак. Якія-небудзь абвінавачванні паводле гэтай справы не прад'яўленыя, ніхто не арыштаваны".

Газета Santa Fe New Mexican апублікавала здымкі (патрабуецца падпіска) відавочна ўзрушанага Болдуіна на паркоўцы адразу пасля таго, што здарылася. Выданне паведамляе, што ягоны журналіст бачыў акцёра, які плакаў пасля размовы з паліцыянтамі.

Галіна Хатчынс расказвала на сваім сайце, што яна нарадзілася і вырасла "ў асяроддзі аленяў і атамных падводных лодак": у сям'і вайскоўца, які служыў на савецкай ваеннай базе за Палярным кругам. Скончыла Кіеўскі дзяржаўны ўніверсітэт паводле спецыяльнасці "міжнародная журналістыка", а потым працавала на здымках дакументальных фільмаў у Вялікай Брытаніі.

У 2015 годзе атрымала кінематаграфічную адукацыю ў ЗША і зрабіла паспяховую кар'еру аператаркі. У 2019 годзе часопіс American Cinematographer назваў яе адной з узыходных зорак амерыканскай кінематаграфіі. У ліку іншага яна здымала стужку пра супергероя "Макс Фіст" ("Archenemy") і фільм жахаў "Любая" (Darlin').

У Кіеве пацвердзілі ўкраінскае грамадзянства Галіны Хатчынс.

"Генеральнае консульства Украіны ў Сан-Францыска высвятляе абставіны і ўзаемадзейнічае з амерыканскімі праваахоўнікамі ў кантэксце расследавання. Консулы таксама вызначаюць сувязь з роднымі ўкраінкі, каб зрабіць неабходную консульскую і прававую дапамогу", – заявілі Бі-бі-сі ў Міністэрстве замежных справаў Украіны.

Калегі ўспамінаюць Галіну Хатчынс як бясспрэчную прафесіяналку.

"Вельмі шмат украінцаў працуе ў Галівудзе. Ва Украіне пра гэта ніхто нічога не ведае, але ў камандах кінематаграфістаў і асістэнты рэжысёраў, і памочнікі аператараў, і аператары, якія працуюць на вялікіх фільмах, вельмі часта ўкраінцы. І шалёная колькасць украінцаў-акцёраў, якія здымаюцца ў Галівудзе на другіх планах, і мы іх не ведаем", – расказаў Украінскай службе Бі-бі-сі сябра Галіны Аляксей Фядосаў, які працаваў разам з ёй на здымках карціны.

"Галя дасягнула вельмі многа, – кажа ён. – Яна вельмі светлы чалавек, я яе часта сустракаў у Амерыканскай гільдыі аператараў, на свецкіх мерапрыемствах. Яе ўсе вельмі моцна любілі, у яе быў цудоўны творчы падыход, я ведаю, што яна тут вучылася і пасля навучання прадоўжыла працу тут. Яна выдатная мама перш за ўсё".

Гільдыя кінематаграфістаў ЗША назвала смерць Хатчынс вельмі кепскай весткай і жудаснай стратай.

"Падрабязнасці таго, што адбылося пакуль не ясныя, але мы іх высвятляем і падтрымліваем паўнавартаснае расследаванне гэтага жудаснага здарэння", – гаворыцца ў заяве гільдыі.

Адзін з апошніх пастоў Галіны ў "Інстаграме" – відэа, на якім яна едзе на кані, з подпісам: "Адна з пераваг здымак вестэрна – гэта тое, што можна ў выходны выправіцца на конны шпацыр".

Як піша Hollywood Reporter, Болдуін гуляе ў карціне "Раст" знакамітага злачынцу Харланда Раста. Паводле сюжэту ягонага ўнука абвінавачваюць у выпадковым забойстве і асуджаюць да павешання. Тады Раст адпраўляецца ў Канзас, каб вызваліць яго з турмы. Дзеянне вестэрна адбываецца ў XIX стагоддзі.

У чацвер 63-гадовы Болдуін змясціў у "Інстаграме" сваю фатаграфію на здымачнай пляцоўцы з подпісам "Бог ты мой, гэта цяжкая справа". Цяпер гэтая фатаграфія недаступная.

Адным з самых вядомых выпадкаў, калі падчас здымак сцэны з стрэламі быў забіты адзін з чальцоў групы, стала гібель акцёра Брэндана Лі ў 1993 годзе. Пры працы над фільмам "Крумкач" у яго выпадкова стрэлілі з няправільна зараджанага пісталета.

Спампоўвайце і ўсталёўвайце мэсэнджар Telegram на свой смартфон або кампутар, падпісвайцеся (кнопка «Далучыцца») на канал «Хартыя-97».