Што зменіцца ў Беларусі ў лістападзе?
10- 25.10.2021, 16:25
- 36,970
Некаторыя новаўвядзенні адаб'юцца на партманэтах беларусаў.
У лістападзе ўсе мы заплацім больш за «камуналку» праз ацяпленне, маладыя мамы атрымаюць іншыя сумы дапамог, а прадаўцы абутку павінны будуць прыклеіць да яго спецыяльную маркіроўку. Таксама ў анонсе новыя палёты (не Чарапавец, але таксама добра), змены законаў, дзіцячыя вакацыі і змены кошту цыгарэт, піша onliner.by.
З 1 лістапада зменяць бюджэт пражытковага мінімуму
Бюджэт пражытковага мінімуму пералічваюць чатыры разы на год - 1 лютага, 1 траўня, 1 жніўня і 1 лістапада. Да гэтага паказчыку прывязаныя сумы некаторых пенсій, а таксама разавыя дапамогі пры нараджэнні дзяцей. Як правіла, бюджэт пражытковага мінімуму кожны раз крыху падвышаецца, а за ім растуць названыя пенсіі і дапамогі. Канкрэтнай лічбы пакуль няма, але яна з'явіцца днямі і будзе дзейнічаць да новага перагляду - 1 лютага 2022 года.
Абутак будзе прадавацца са спецыяльнай маркіроўкай
З лістапада запрацуюць новаўвядзенні, якія закранаюць рэалізацыю абутку. Новаўвядзенні тычыцца маркіроўкі тавараў сродкамі ідэнтыфікацыі.
Са звестак Міністэрства падаткаў і збораў, пасля 1 лістапада дазваляецца прадаваць абутак толькі пасля яго маркавання, а для гэтага варта правесці інвентарызацыю рэшткаў. Пра тое, што такое маркіроўка, мы ўжо пісалі.
У залежнасці ад дзейнасці для суб'ектаў гаспадарання ёсць тры варыянты дзеянняў.
Для тых, хто прадае рэшткі абутку ў Беларусі оптам і ў раздробным гандлі, для атрымання кодаў маркіроўкі трэба паведаміць у сістэму маркіроўкі назвы і колькасць абутку, затым атрымаць коды і наклеіць іх. Потым абавязкова ўнесці інфармацыю аб нанясенні маркіроўкі ў спецыяльную сістэму.
Калі рэшткі абутку мяркуецца прадаваць за мяжу, то для атрымання кодаў трэба ўнесці інфармацыю пра іх у «Банк звестак электронных пашпартоў тавараў», затым у аператара сістэмы маркіроўкі купіць код, прамаркіраваць тавар і ўнесці інфармацыю аб праведзенай маркіроўцы ў сістэму.
Калі ж рэшткі тавараў мяркуецца прадаваць на тэрыторыі ЕАЭС, усё павінна быць трохі прасцей. Для пачатку трэба праверыць, ці ёсць у сістэме звесткі аб праведзенай раней маркіроўцы (двойчы маркіраваць тавары не трэба). Для гэтага можна перадаць у сістэму маркіроўкі звесткі аб кодах і назве тавару. Пасля пацвярджэння аператар прызнае абутак маркіраваным, і тады можна яе прадаваць.
Новыя кошты цыгарэт
І ў канцы традыцыйнае падаражанне цыгарэт з 1 лістапада. Як звычайна, першага дня кожнага месяца беларускія вытворцы і імпарцёры цыгарэт размяшчаюць максімальныя раздробныя цэны на сайце МПЗ. Як правіла, кошты вырастаюць на 5-15 капеек, звесткі пра наступны месяц з'явяцца днямі.
Для атрымання вашых персанальных звестак - не толькі пісьмовая згода
З 15 лістапада ўваходзіць у дзеянне Закон аб абароне персанальных звестак. Напрыклад, з гэтага моманту да персанальных звестак будзе належаць уся інфармацыя, з дапамогай якой можна ідэнтыфікаваць фізасобу. Раней згода на апрацоўку персанальных звестак давалася толькі ў пісьмовай форме, а з сярэдзіны кастрычніка - яшчэ і ў пісьмовай форме, з дапамогай CMC-паведамлення з кодам, электроннай пошты, выстаўленнем пазнакі на сайце.
Новыя палёты, але толькі ў Расею
Калі раптам у вас скончыліся жарты наконт сямейнага адпачынку ў Чарапаўцы замест Еўропы, то цяпер можна будзе іх абнавіць. З 4 лістапада расейская авіякампанія «Азімут» пачне выконваць штодзённыя рэйсы з Калугі ў Менск.
Таксама авіякампанія павялічыць колькасць рэйсаў Краснадар - Менск: серадамі і суботамі будуць прамыя пералёты, а чацвяргамі - з прамежкавай пасадкай у Калузе. Акрамя гэтага, авіякампанія будзе лётаць у Менск з Мінеральных Вод штотыдзень панядзелкамі, а з Растова-на-Доне двойчы на тыдзень - серадамі і нядзелямі.
Пачнуцца школьныя канікулы
Да восеньскіх канікул у школах і гімназіях засталося ўсяго нічога. Канікулы для школьнікаў пачнуцца 31 кастрычніка і скончацца 8 лістапада.