Беларускія IT-кампаніі, якія пераехалі ў Літву, лідары ў заробках на рынку

IT-бізнэс пакідае Беларусь.

Паводле колькасці супрацоўнікаў самы буйны офіс EPAM Systems, адкрыты год таму ў Вільні, ужо апярэдзіў многіх «дзядоў» мясцовага рынку, а сярэднія заробкі ў беларускіх працадаўцаў вышэйшыя, чым у большасці гульцоў.

Паводле звестак на ліпень 2021, апублікаваных рэсурсам Rekvizitai.lt, колькасць супрацоўнікаў самага буйнога працадаўцы з беларускім капіталам кампаніі Epam sistemos, складала 262 чалавекі, піша «Заўтра тваёй краіны».

Гэтая кампанія, заснавальнікам, кіраўніком і акцыянерам якой з'яўляецца экс-мянчук Аркадзь Добкін, адкрыла паўнавартасны цэнтр распрацоўкі ў Вільні толькі ў кастрычніку мінулага года. Але ўжо за год дачка EPAM Systems здолела апярэдзіць паводле штату шматлікія буйныя IT-кампаніі, якія працуюць на літоўскім рынку, у тым ліку, дзесяцігоддзямі. У іх ліку, напрыклад, якія ўваходзяць у топ-50 найбуйнейшых падаткаплацельшчыкаў Літвы ў сферы інфармацыі і сувязі Asseco Lietuva (201 супрацоўнік), Tieto Lietuva (121), CGI Lithuania (201), BALTIC AMADEUS (228), INSOFT (177), DXC Technology Baltic (221), Softera Baltic (112), Bentley Systems Europe (234) і EIS Group Lietuva (168). Паволдле колькасці супрацоўнікаў EPAM Systems ужо ўваходзіць у топ-20 найбуйнейшых IT-кампаній, якія працуюць на літоўскім рынку.

У цэлым у канцы 2020 года і цягам 2021 года офісы і цэнтры распрацоўкі ў Літве адкрылі звыш дзесяці беларускіх IT-бізнэсаў. Найбуйнейшымі ў штаце з іх пасля EPAM Systems на сярэдзіну ліпеня гэтага года з'яўляліся Flo Health LTU (44 супрацоўнікі), Coherent Solutions (36), Belka Games LT (19) і Itransition (19).

Асаблівасцю, прынамсі, на этапе станаўлення бізнэсу ў Літве, з'яўляецца дастаткова высокі ўзровень сярэдніх заробкаў у беларускіх IT-кампаній.

Coherent Solutions з паказчыкам 4 606,90 еўра ў ліпені гэтага года ўваходзіла ў лік лідараў сярод літоўскіх працадаўцаў у гэтай сферы. Яшчэ ў трох кампаній з беларускім капіталам (EPAM sistemos, Flo Health LTU і Belka Games LT) сярэднія заробкі былі вышэйшыя за за 4 тысячы еўраў, што, мяркуючы са дадзеных Rekvizitai.lt, сустракаецца ў вышэйшым эшалоне літоўскай IT-сферы не так часта.

Усяго за мінулы год, са звестак заснавальніка стартап-хаба Imaguru Таццяны Марыніч, з Беларусі з'ехала звыш 20 тысяч спецыялістаў, уключаючы 58% усіх заснавальнікаў стартапаў.

У Літве, акрамя Flo Health, які блізкі да таго, каб стаць яшчэ адным беларускім стартапам- «аднарогам», адкрыў цэнтр распрацоўкі праект Wannaby. Уласна і сам хаб Imaguru, які даў пуцёўку ў жыццё многім інавацыйным ідэям беларусаў, з нядаўніх часоў таксама месціцца ў Вільні.

- Хтосьці можа думаць: «А нам што ад таго, што з'ехалі праграмісты». Але не трэба недаацэньваць ролю інавацыйнага бізнэсу ў эканоміцы, бо ён забяспечвае развіццё не выключна IT-сектара. З'яўляючыся інклюзіўным, ён дапамагае ліквідаваць асноўныя сацыяльныя парывы. Гэта таксама стварэнне новых працоўных месцаў, новых сектараў эканомікі на стыку тэхналогій. Спецыялісты IT-індустрыі атрымліваюць прыбытак вышэйшы за сярэдні і спрыяюць развіццю сістэмы спажывання, стымулююць якасць жыцця для ўсяго грамадства. Настаўнік ці супрацоўнік кампаніі ў традыцыйным сектары, можа быць, не адчуе змены якасці жыцця проста заўтра, але ў доўгатэрміновай перспектыве гэтыя змены наступяць», - заявіла Таццяна Марыніч падчас онлайн-дыскусіі пра будучыню эканомікі Беларусі, якая адбылася ў кастрычніку гэтага года.