Прэзідэнт Нямеччыны і Папа Рымскі абмеркавалі сітуацыю ў Беларусі

Яны назвалі паводзіны рэжыму Лукашэнкі безадказнымі.

Прэзідэнт Нямеччыны Франк-Вальтэр Штайнмаер і Папа Рымскі Францыск абмеркавалі сітуацыю з міграцыяй на мяжы Беларусі і ЕЗ падчас візіту Штайнмаера ў Ватыкан 25 кастрычніка.

Са слоў Штайнмаера, Папа занепакоены міграцыйным ціскам на Усходнюю Еўропу.

«Вядома, зараз мы з некаторым непакоем назіраем за тым, што адбываецца на беларуска-літоўскай і беларуска-польскай межах, і Папа спытаў, як гэта цяпер уплывае на колькасць уездаў у Нямеччыну. Я расказаў яму ўсё, што нам вядома пра існы стан спраў. Мы абодва пагадзіліся, што практыка, падобная той, якую цяпер выкарыстоўваюць беларускія ўлады, без якой-небудзь адказнасці за людзей, якіх любымі спосабамі забіраюць з Блізкага Усходу, дастаўляюць самалётамі ў Менск, а потым адпраўляюць у бок межаў, з'яўляецца безадказнымі паводзінамі, якія ні ў якім разе нельга ўхваліць», - цытуе Штайнмаера Vatican News.