У Латвіі прапанавалі, каб непрышчэпленыя самі кампенсавалі выдаткі на сваё лячэнне

Такую прапанову ацэніць Сейм краіны.

Камісія Сейма Латвіі што да мандатаў, этыкі і заяў мае намер ацаніць ініцыятыву, падпісаную больш чым 10 000 жыхароў, аб абавязку неабгрунтавана невакцынаваных самастойна кампенсаваць выдаткі на лячэнне ў сувязі з Covid-19.

Аб гэтым піша Delfi.

Паседжанне камісіі прызначанае на 27 кастрычніка. На сустрэчу запрошаны аўтар ініцыятывы Сандзіс Краваліс і прадстаўнік Міністэрства аховы здароўя.

Аўтар ініцыятывы паведаміў, што кошт адной вакцыны ў 300-400 разоў ніжэйшы за кошт лячэння пацыента ў рэанімацыйным аддзяленні, і пры гэтым лячэнне пацыентаў з Covid-19 цяпер аплачваюць падаткааплатнікі.

Пры гэтым ён падкрэсліў, што больш за 97 адсоткаў пацыентаў з Covid-19, якія паступаюць у лякарні з сярэднім і цяжкім захворваннем, не прышчэпленыя. Таму, з ягоных слоў, «прышчэпленая частка насельніцтва не павінна несці адказнасць за наступствы пастаноў, прынятых іншымі».

На ягоную думку, Сейму варта заканадаўча замацаваць, што ў выпадках пандэміі дарослыя, якія адмаўляюцца ад вакцыны і заразяцца, у гэтым выпадку Covid-19, павінны несці адказнасць за сваю пастанову і кампенсаваць хаця б частку кошту лячэння.

Прэзідэнт Латвіі Эгілс Левітс раней заявіў, што чакае якаснага абмеркавання гэтай ініцыятывы ў парламенце.

Нагадаем, урад Латвіі зацвердзіў жорсткі локдаўн з 21 кастрычніка да 15 лістапада.