Facebook закрыў тры групы аб нелегальнай міграцыі ў ЕЗ праз Беларусь

Аб гэтым кампанію папрасілі польскія спецслужбы.

Facebook заблакаваў тры групы, якія садзейнічалі незаконнай міграцыі ў краіны ЕЗ, паведамляе партал урада Польшчы.

Паблікі выкарыстоўваліся для садзейнічання нелегальнай міграцыі з Беларусі ў Еўрапейскі Звяз. Групы былі заблакаваныя на хадайніцтва польскіх спецслужбаў пры садзейнічанні пасольства ЗША.

«Звесткі, пададзеныя адміністрацыі партала, пацвердзілі, што названыя групы ў Facebook задзейнічаныя ў арганізацыі нелегальнай міграцыі ў Еўрапейскі Звяз. Матэрыялы ўказвалі на ўдзел у злачыннай працэдуры, якая мае характар гібрыднай вайны супраць Захаду», - паведамляецца ў прэс-рэлізе.

Польскі бок прадоўжыць супрацоўніцтва з Facebook, каб своечасова блакаваць далейшыя гібрыдныя дзеянні супраць Польшчы.