У Белавежскай пушчы развялося зашмат зуброў

Ёсць два спосабы рэгулявання іх колькасці.

У Белавежскай пушчы паводле апошняга перапісу жывуць 675 зуброў. Гэта ўдвая больш за аптымальную колькасць жывёл у нацпарку, усім месца не стае. Тэлеканал «Мір» распавядае, як навукоўцы збіраюцца рэгуляваць іх колькасць.

Зуброў перапісваюць раз на год - бліжэй да зімы, калі жывёлы збіраюцца ў статкі. Цяпер, мяркуючы з апошняга перапісу, у Белавежскай пушчы жыве 675 асобін, што ўдвая больш за аптымальную колькасць.

На думку навукоўцаў, белавежскае пагалоўе трэба рэгуляваць. Выдаткаў на харчаванне зуброў шмат, жывёлы сталі выходзіць на сельскагаспадарчыя палеткі і шкодзіць сельгаспрадпрыемствам.

Ёсць два спосабы рэгулявання колькасці зуброў, паведамляе тэлеканал.

Першы: пашырэнне параметраў рэзервовага фонду, куды цяпер уваходзяць старыя і хворыя жывёлы.

У рэзервовы фонд зуброў вызначае спецыяльная камісія, якая кіруецца інфармацыяй з назіранняў за жывёламі.

На зуброў з рэзервовага фонду можна паляваць. Такое паляванне, паводле звестак тэлеканала, карыстаецца папулярнасцю ў замежнікаў. Кошт тура можа даходзіць да 10 тысяч еўраў.

Другі метад: больш актыўнае перасяленне зуброў. Як унутры краіны, так і за яе межамі.

Дарэчы, Беларусь з'яўляецца лідарам у колькасці зуброў. У нас жыве блізу дзвюх тысяч асобін. Ва ўсім свеце іх амаль 9 тысяч. А шэсць гадоў таму зуброў на планеце было блізу 6 тысяч.