Аналена Бербок стане першай жанчынай на чале міністэрства замежных спраў Нямеччыны
3- 26.11.2021, 11:31
- 3,290
фота: EPA
Нямецкія «зялёныя» дамовіліся аб размеркаванні пасад у новым урадзе.
Цэлы шэраг міністэрскіх пасад у новым кабміне Нямеччыны дастанецца жанчынам, паведамляе DW. Нямецкія "зялёныя" дасягнулі пагаднення ў барацьбе за размеркаванне партфеляў у новым урадзе. Федэральная ўправа партыі "Унія-90"/"зялёныя" бачыць яе сустаршыню Роберта Хабэка ў ролі кіраўніка новага міністэрства ў справах эканомікі і абароны клімату, а таксама віцэ-канцлера, паведаміў выканаўчы сакратар Міхаэль Кельнер увечары ў чацвер, 25 лістапада. Яшчэ адная лідарка "зялёных", Аналена Бербок, павінна ўзначаліць міністэрства замежных спраў.
Міністрам харчавання і сельскай гаспадаркі Нямеччыны павінен стаць былы сустаршыня партыі Джэм Аздземір. Са слоў Кельнера, за яго кандыдатуру аднагалосна прагаласавалі ўсе чальцы федэральнай управы.
Федэральным міністрам у справах сям'і, паджылых грамадзян, жанчын і моладзі стане Ганне Шпігель, якая пакуль займае пасаду міністра ў справах абароны клімату зямлі Рэйнланд-Пфальц. Партфель міністра ў пытаннях аховы навакольнага асяроддзя, абароны прыроды, ядзернай бяспекі і абароны правоў спажыўцоў пераходзіць да Штэфі Лемке, якая з 2002 да 2013 гады займала пасаду федэральнай выканаўчай сакратаркі "зялёных".
А віцэ-старшыня бундэстага Клаўдыя Рот становіцца дзяржміністаркай у пытаннях культуры і СМІ. Пры гэтым сустаршыня фракцыі "зялёных" у бундэстагу Катрын Герынг-Экарт не атрымае месца ў новым федэральным урадзе.
Выканаўца абавязкаў міністра замежных спраў ФРГ Хайко Мас павіншаваў сустаршыню "зялёных" з тым, што яна стане наступным кіраўніком МЗС Нямеччыны.
Herzlichen Glückwunsch, liebe @ABaerbock! Mit Dir als Außenministerin soll das Auswärtige Amt zum ersten Mal von einer Frau geführt werden. Nach 151 Jahren ist es höchste Zeit! Deutschland in der Welt zu vertreten ist Ehre & Herausforderung zugleich. Alles erdenklich Gute dafür!
— Heiko Maas 🇪🇺 (@HeikoMaas) November 25, 2021
“Сардэчныя віншаванні, дарагая Аналена Бербок! У тваёй асобе МЗС упершыню будзе ўзначальваць жанчына. Праз 151 год з моманту стварэння пасады самы час для гэтага! Прадстаўляць Нямеччыну ў свеце - гонар і выклік адначасова”, - напісаў Мас у Twitter.
Днём раней у Бэрліне была прадстаўленая кааліцыйная дамова паміж Сацыял-дэмакратычнай партыяй Нямеччыны (СДП), "зялёнымі" і Свабоднай дэмакратычнай партыяй (СвДП). Будучы ўрад ФРГ называюць "святлафорам" паводле колераў трох палітычных сіл, якія яго фармуюць.
