Літва можа закрыць пункты пропуску на мяжы з Беларуссю
8- 26.11.2021, 14:46
- 13,446
МУС Літвы адрэагавала на спробы перавозу мігрантаў у грузавіках.
Літва можа закрыць пункты пропуску на мяжы з Беларуссю, калі будзе і надалей выяўляць спробы перавозу мігрантаў у грузавіках. Аб гэтым заявіла Міністэрства ўнутраных спраў Літвы.
Міністр унутраных спраў Літвы Агнэ Білатайтэ паведаміла аб павелічэнні колькасці выпадкаў перавозкі нелегальных мігрантаў з Беларусі ў Літву аўтамабільным транспартам, піша lrt.lt. Калі спробы перавезці мігрантаў павялічацца, будзе разгледжанае пытанне аб закрыцці памежных кантрольна-прапускных пунктаў, паведаміла міністр.
«Мы назіраем новыя выпадкі спроб уехаць у Літоўскую Рэспубліку на грузавіках, і таму была прынятая пастанова актывізаваць і ўзмацніць кантроль за транспартнымі сродкамі. Калі мы ўбачым, што гэтыя тэндэнцыі растуць, мы, безумоўна, разгледзім закрыццё памежных кантрольна-прапускных пунктаў», - сказала Білатайтэ журналістам пасля сустрэчы са службовымі асобамі памежнай каманды Дзяржаўнай памежнай службы (VSAT) у пятніцу.
З яе слоў, са жніўня, калі была прынятая пастанова не дапускаць нелегальных мігрантаў на тэрыторыю Літвы, больш за 7 000 нелегальных мігрантаў атрымалі адмову ва ўездзе.
Білатайтэ ў адказе на пытанне, якія тэндэнцыі нелегальнай міграцыі з Беларусі можна чакаць найбліжэйшым часам, сказала, што пра гэта цяжка гаварыць, бо беларускі дыктатар Аляксандр Лукашэнка з'яўляецца непрадказальным чалавекам.
«Гэты чалавек, Лукашэнка, зусім непрадказальны, і мы не можам ведаць, што можа стрэльнуць яму ў галаву. Наша мэта - паўплываць як на Еўрапейскі Звяз, так і на іншыя ўзроўні, каб Лукашэнка, які арганізаваў увесь гэты міграцыйны крызіс, адказваў за свае дзеянні», - пракаментавала міністр.
Як паведамляе сайт Charter97.org, учора мігрантаў спрабавалі завезці ў ЕЗ у запламбаванай фуры.