Ілля Шкурын: Я рабіў усё, што мог, каб падтрымаць сваіх суайчыннікаў

Нападнік кіеўскага «Дынама» расказаў, як змяніўся беларускі спорт пасля прэзідэнцкіх выбараў.

Беларускі нападнік кіеўскага «Дынама» Ілля Шкурын у інтэрв'ю польскаму выданню распавёў пра тое, як змяніўся беларускі спорт пасля прэзідэнцкіх выбараў.

- Праз тыдзень пасля прэзідэнцкіх выбараў у Беларусі вы адмовіліся гуляць за зборную. Чаму?

- Я зрабіў гэта, калі ўбачыў, як страляюць у людзей і кідаюць у іх гранаты. Потым былі масавыя рэпрэсіі і бясчынства ўладаў. Я рабіў усё, што мог, каб падтрымаць сваіх суайчыннікаў.

- Хто-небудзь з гульцоў у той момант дзейнічаў гэтак жа, як вы?

- Менавіта ў той момант - ніхто з гульцоў. Але і ў іншых дысцыплінах такія сітуацыі здараліся, напрыклад, баскетбалісты кідалі гуляць за зборную.

- Ці моцна змянілі тыя падзеі беларускі спорт?

- Змянілася ўсё, змяніўся і спорт. У мяне ёсць сябры не толькі сярод спартоўцаў, якім давялося збегчы з краіны і нават змяніць грамадзянства. Некаторыя былі арыштаваны. Урад і спартыўныя федэрацыі дыктуюць спартоўцам, на чыім баку стаяць. Калі вы не згодны - нічога добрага вас не чакае, - сказаў Шкурын.