Адна з самых прышчэпленых краін свету ўводзіць бустэрную вакцынацыю ад COVID

Атрымаць трэцюю прышчэпку змогуць усе ахвочыя ад 18 гадоў.

Ірландыя, адна з самых прышчэпленых краін свету, уводзіць бустэрную вакцынацыю ад каранавіруса. Атрымаць трэцюю прышчэпку змогуць усе ахвочыя ад 18 гадоў.

Пра гэта паведамляе The Guardian.

Амаль 90% з 3,9 млн чалавек старэйшыя за 12 гадоў, якія маюць права на вакцынацыю ў Ірландыі, прайшлі поўную вакцынацыю, а бустэрныя прышчэпкі раней былі адобраны для асоб старэйшых за 50 гадоў і для тых, хто мае сур'ёзныя праблемы са здароўем.

На сённяшні дзень было праведзена амаль 670 тысяч рэвакцынацый.

«Мы працягваем надаваць прыярытэтную ўвагу вакцынацыі, бо ведаем, што яна станоўча ўплывае на ўзровень шпіталізацыі, цяжкіх захворванняў і смяротнасці ад COVID сярод людзей старэйшых за 70 гадоў», – заявіў міністр аховы здароўя Стывен Данэлі.