Казахстан пачаў закупляць турэцкія беспілотнікі
10- 29.11.2021, 20:44
- 5,882
Пастаўкі пачнуцца налета.
Казахстан услед за Украінай пачынае закупляць турэцкія беспілотныя лятальныя апараты для ўзброеных сіл.
Як паведамляе Anadolu, «Казспецэкспорт» ад імя Міністэрства індустрыі і інфраструктурнага развіцця Казахстана падпісаў кантракт на пастаўку БПЛА ANKA з турэцкай аэракасмічнай кампаніяй Türk Havacılık ve Uzay Sanayi AŞ (TUSAŞ).
У адпаведнасці з дамовай ВПС Казахстана да 2023 года атрымаюць тры беспілотнікі, абсталяваныя электраоптыкай, інфрачырвоным портам і лазерным далямерам з камерай.
Да дронаў, здольных паднімацца на вышыню да 10 км, перавозіць 350 кг грузаў і выконваць місіі на далёкасці да 250 км, прыкладаецца 2 наземныя базы, а таксама пакет лагістычнай падтрымкі (тэхнічная дакументацыя, навучанне і запасныя часткі).
Гендырэктар TUSAŞ Тэмел Коціл назваў кантракт з Казахстанам важным поспехам кампаніі ў плане экспарту. «Пастаўкі беспілотнікаў ANKA у Казахстан услед за Тунісам - вельмі важнае дасягненне для нас. Прыемна, што рынак экспарту дронаў расце», - сказаў ён.