Японскія макакі навучыліся рыбаліць, каб перажыць халады

Жывёлы часцяком самі вылоўліваюць здабычу з вады.

Японская макака (Macaca fuscata) - самы паўночны від прыматаў у свеце. Яна жыве на ўсіх астравах Японіі, акрамя Хакайда. А на поўначы краіны снег можа ляжаць да чатырох месяцаў у годзе, пры гэтым сярэдняя тэмпература паветра складае мінус пяць градусаў Цэльсія. Так што зімой гэтыя дзіўныя жывёлы грэюцца ў гарачых крыніцах, піша Naked science.

Яны селяцца ва ўсіх тыпах лясоў - ад субтрапічных да горных, дзе харчуюцца лісцем, пладамі раслін, кузуркамі, дробнымі хрыбетнымі і птушынымі яйкамі. Але звычайны рацыён японскіх макак - садавіна, насенне, лісце і кветкі. Аб тым, што снежныя малпы могуць харчавацца марской рыбай і малюскамі, зрэшты, вядома даўно. Меркавалася, аднак, што гэта адбываецца зрэдку і макакі проста падбіраюць морапрадукты, выкінутыя на бераг.

Міжнародная каманда навукоўцаў, якую ўзначальваюць спецыялісты з Бірмінгемскага ўніверсітэта (Вялікая Брытанія), вывучыла зімовы рацыён японскіх макак, якія жывуць у запаведніку Камікочы, прааналізаваўшы іх экскрэменты пры дапамозе метабаркадавання. Свае высновы даследнікі прадставілі ў часопісе Scientific Reports.

У экскрэментах прыматаў выявілі рыбную луску і лічынкі водных кузурак. Так навукоўцы даведаліся, што жывёлы харчуюцца і прэснаводнымі істотамі - рачной рыбай (уключаючы бурую стронгу і кумжу), малюскамі і воднымі казуркамі. Гэта дадатковыя крыніцы іх ежы для выжывання ў халады.

«Японскія макакі зімой маюць шырокі арэал пры прыкметным недахопе харчовых рэсурсаў. Камікочы знаходзіцца ў глыбокай даліне, дзе яны не могуць перайсці горы. Шчыльнасць папуляцыі вельмі высокая, таму макакі вымушаныя зімаваць у надзвычай суровых умовах.

Буйныя папуляцыі ствараюць дадатковы стрэс, але багацце ўзыходзячых плыняў грунтавых вод і прытоку гарачых крыніц ад дзейных вулканаў забяспечвае цячэнне многіх ручаёў без ледзянога покрыва, што дазваляе малпам лёгка дабрацца да іх», - распавёў першы аўтар працы Аляксандр Мілнер з Бірмінгемскага ўніверсітэта. Навукоўцы ўстанавілі, што частка рыбнага рацыёну выносіцца на сушу плынню (дзе яго і падбіраюць жвавыя макакі), але ў некаторых выпадках жывёлы самі вылоўліваюць здабычу з вады.