Праблемныя завінавачанасці беларускіх «флагманаў» перавысілі мільярд рублёў

Шмат завінаваціліся як самі прадпрыемствы, так і іх дэбіторы.

Беларускія флагманы зрабілі справаздачу аб сумах пратэрмінаванай запазычанасці на замежных рынках. Шмат завінаваціліся як самі прадпрыемствы, так і іх дэбіторы, піша banki24.by.

Замежную пратэрмінаваную запазычанасць флагманскіх кампаній можна характарызаваць з двух бакоў.

Па-першае, гэта праблемныя завінавачанасці бізнэсу перад замежнымі партнёрамі, па-другое, гэта "дрэнныя" пазыкі замежных партнёраў перад беларускім бізнэсам.

Абедзве апісаныя з'явы пагаршаюць якасць разлікаў і могуць весці да утварэння і/або росту ланцужкоў неплацяжоў у эканоміцы.

Ланцужок неплацяжоў - гэта сітуацыя, калі праз праблемы з плацяжамі ў аднаго з прадпрыемстваў стаяць разлікі ў ягоных партнёраў, а затым - у партнёраў партнёраў і г.д.

Снежны ком неплацяжоў можа ахопліваць дзясяткі бізнэсаў, у якіх ёсць праблемы з уласнымі абарачальнымі сродкамі і высокая закрэдытаванасць.

Разарваць такі ланцужок нават з дапамогай уліванняў са скарбніцы бывае вельмі складана.

Даведка: на 1 кастрычніка 2021 года 25,3% флагманскіх кампаній Беларусі не мелі ўласных абарачальных сродкаў, а яшчэ 8,8% кампаній былі забяспечаныя ўласным абарачэннем ніжэй за нарматыў.

Пры гэтым у флагманскіх прадпрыемстваў апрацоўчай прамысловасці 26,6 адсотка не мелі ўласнага абарачэння, а 11,2 адсотка паказалі яе дэфіцыт, энэргетыкі - 30,2 адсотка і 9,4 адсотка, сельскай гаспадаркі - 19,6 адсотка і 8,7 адсотка, будаўніцтва - 27, 4% і 10%, аптовага гандлю - 18, 2% і 13, 4%, раздробнага гандлю - 48, 8% і 9, 1%, транспарту - 32, 1% і 8, 8%.

Сумарныя пазыкі флагманаў краіны да 1 кастрычніка дасягнулі рэкорднага значэння за ўсю гісторыю замераў - 162,8 млрд BYN.

На справаздачную дату аб'ём пазык флагманскіх прадпрыемстваў перавысіў чаканы чыноўнікамі ВУП за 2021 год.

Пратэрміноўку флагманаў РБ на замежным контуры адлюстроўвае "дрэнная" замежная крэдыторская запазычанасць, пратэрміноўку дэбітораў флагманскіх бізнэсаў Беларусі - праблемная замежная дэбіторская запазычанасць.

На 1 кастрычніка 2021-га пратэрмінаваная замежная крэдыторская запазычанасць склала 1,015 млрд BYN. Дзель праблемных абавязанняў перад замежнымі партнёрамі на справаздачную дату дасягнула 7,7% - гэта кожны трынаццаты "рубель".

Без малога тры чвэрці пратэрмінаванай замежнай крэдыторскай запазычанасцм сфармавалі флагманы апрацоўчай прамысловасці - 722,7 млн BYN у эквіваленце. Удзельная вага пратэрміноўкі ў апрацоўчых галінах склала 11,2%, або кожны дзявяты "рубель".

На 1 кастрычніка пратэрмінаваная знешняя дэбіторка дасягнула 1,027 млрд BYN. Дзель праблемных абавязанняў замежных партнёраў на справаздачную дату дасягнула 7,9%.

Блізу 574,2 млн BYN пратэрміноўкі забяспечыла апрацоўчая прамысловасць, а яшчэ 205,8 млн BYN - энэргетыка. У апрацоўчых галінах дзель пратэрміноўкі склала 8,7%, у энэргетыцы - 35,1%.