Амікрон-штам выклікае лёгкую форму захворвання ў людзей, якія прайшлі вакцынацыю ад каранавіруса

Тым, хто не прайшоў вакцынацыю, пагражае шпіталізацыя.

Амікрон-штам каранавіруса выклікае лёгкую форму захворвання ў людзей, якія прайшлі вакцынацыю ад каранавіруса, аднак тым, хто не зрабіў прышчэпку, можа пагражаць шпіталізацыя. Аб гэтым заявіў у пятніцу міністр аховы здароўя ПАР Джо Паахла, паведамляе ТАСС.

"Амікрон-штам выклікае захворванне ў лёгкай форме ў асоб, якія прайшлі вакцынацыю, але павялічвае колькасць шпіталізаваных сярод непрышчэпленых", - адзначыў ён на брыфінгу, які трансляваўся на партале Міністэрства аховы здароўя ПАР.

Паахла паведаміў, што ПАР знаходзіцца на парозе чацвёртай хвалі пандэміі каранавіруса.

"За апошнія сем дзён колькасць выпадкаў захворвання COVID-19 значна вырасла, - падкрэсліў ён. - Пад'ём цяперашняй хвалі нашмат большы, чым тры папярэднія". Паводле ягоных слоў, эпіцэнтрам распаўсюджвання амікрон-штаму застаецца сталічная правінцыя Гаўтэнг, але інфекцыя распаўсюджваецца і ў іншых частках краіны.

"У нас ёсць пацверджаныя звесткі аб тым, што амікрон-штам лёгка перадаецца ад чалавека чалавеку, - заявіў Паахла. - Усе тыя, хто яшчэ не зрабіў прышчэпку ад каранавіруса, павінны як мага хутчэй прайсці вакцынацыю, каб абараніць сябе ад яго".

Закранаючы паходжанне амікрон-штаму, Паахла адзначыў, што ўпершыню гэты варыянт каранавіруса быў выяўлены ў Батсване. "Аднак пакуль мы не ведаем, якім чынам і дзе ён узнік", - заўважыў міністр.