Польская разведка: Беларускія памежнікі трымаюць мігрантаў у сваіх будынках у прамежках паміж штурмамі

Палякі паказалі відэа з беспілотніка.

У Польшчы працягваюць публікаваць відэа з мяжы з Беларуссю. Польскія вайскоўцы паказалі кадры, знятыя беспілотнікам, дзе мігрантаў трымаюць у беларускіх памежных будынках. А яшчэ палякі паказалі кадры з новымі штурмамі.

«Мігранты з беларускага боку размешчаны на аб'ектах памежнай аховы. Групы візуальнай разведкі Польшчы кругласутачна вядуць маніторынг абстаноўкі ў памежнай зоне і на мяжы з Беларуссю», — заявілі ў твітар-старонцы Войска Польскага.

Тамака паказалі відэа, верагодна, знятае беспілотнікам, на якім каля будынкаў у памежнай зоне перасоўваюцца нейкія групы людзей. Яны заходзяць у будынкі, потым зноў сыходзяць у лес.

Яшчэ адно відэа пасадзіў сабе на старонку прэс-сакратар міністра, які каардынуе працу польскіх спецслужбаў, Станіслаў Жарын. Ён заявіў, што гэта тая ж група мігрантаў. Яна перасоўваецца ўздоўж мяжы.

Таксама Падляская паліцыя заявіла, што «афіцэры і салдаты, якія ўмяшаліся ў спробу перасекчы мяжу паміж Апакам і Волкай Церахоўскай, былі аслепленыя беларускімі афіцэрамі страбаскопам і лазерамі». І апублікавала адпаведнае відэа.

Штурм пад эпічную музыку

Памежная служба Польшчы таксама выклала відэа, як «раніцай яшчэ адна група замежнікаў сілавым шляхам фарсіравала мяжу Беларусі з Польшчай».

«У бок патрулёў польскіх службаў кідалі камяні, кавалкі дрэва, галіны і металічныя трубкі. Ніхто не змог прарваць мяжу», - паведамілі ў твітэр-старонцы польскай памежнай службы.

Палякі знялі, як за калючую загароду людзі (верагодна, мігранты) кідаюць розныя прадметы. Чутныя размовы на замежнай мове.

Дарэчы, да ўсяго, у відэа чуваць эпічную музыку. Хутчэй за ўсё яе наклалі самі аўтары.