Мінфін Расеі робіць «кантрольны стрэл» у рубель

Урад РФ будзе рэкордна набываць валюту другі месяц запар.

Мінфін Расеі ў снежні прадоўжыць скупку валюты для напаўнення Фонду нацыянальнага дабрабыту ў рэкордных аб'ёмах, паведамляе finanz.ru.

З 7 снежня да 13 студзеня на валютныя інтэрвенцыі на Маскоўскай біржы з бюджэту будзе накіравана 505 млрд рублёў, паведаміла ўстанова ў пятніцу.

За месяц ЦБ, які праводзіць аперацыі ў інтарэсах Мінфіна, забярэ з звароту рынку 6,8 млрд даляраў – толькі крыху менш за лістападаўскія 7,2 млрд, якія сталі беспрэцэдэнтнай сумай за чатыры гады існавання бюджэтнага правіла.

Дзённы аб'ём інтэрвенцый складзе 22,8 млрд рублёў, або 310 млн даляраў супраць 360 млн у лістападзе.

Набыццё валюты і золата, на якое дзяржава накіроўвае дадатковыя нафтагазавыя прыбыткі, застанецца ў 1,5 разы вышэйшым за ўзровень канца лета, нягледзячы на істотнае падзенне коштаў нафты: у лістападзе бараль расейскай Urals апускаўся ніжэй за 70 даляраў на фоне панікі праз штам «амікрон».

Танную нафту бюджэту скампенсаваў дарагі газ, тлумачыць Мінфін: прыбыткі лістапада былі на 105,2 млрд рублёў вышэйшыя за план, і гэтую суму дадалі да аб'ёму інтэрвенцый у снежні.

З пачатку года Мінфін набыў на МасБіржы 32 млрд даляраў, накіраваўшы на гэтыя мэты 2,3 трыльёна рублёў – прыкладна 10% усіх прыбыткаў федэральнай скарбніцы. У выніку з звароту рынку і эканомікі ў ФНБ было канфіскавана блізу траціны чыстага прытоку валюты паводле актуальнага рахунку плацежнага балансу, які ЦБ ацаніў на 94,2 млрд даляраў.

Валюты на рынку становіцца менш, а рубель робіцца слабейшым. Рэзкі рост інтэрвенцый, які адбыўся ў лістападзе, адняў у курса расейскай валюты 2-3 рублі, ацэньвае Ягор Сусін, кіраўнік дырэктар ГПБ Private Banking.

Пазбаўлены нафтадаляравай апоры, рубель становіцца больш уразлівым да плыняў спекулятыўнага капіталу, пакупак і продажаў расейскай дзяржпазыкі замежнікамі, адзначае галоўны эканаміст ING у РФ і СНД Дзмітрый Даўгін.

Але бюджэту моцны рубель і не патрэбны: чым вышэйшыя курсы даляра і еўра, тым вышэйшыя нафтагазавыя прыбыткі – і тым больш валюты і золата можна скласці ў «скрынку».

На 1 лістапада ў фондзе, які першапачаткова ствараўся для забеспячэння пенсійнай сістэмы, а потым трансфармаваўся ў фонд для аплаты дзяржбудаўніцтва і затыкання дзірак у перыяды крызісаў, знаходзілася 13,9 трлн (197,7 млрд даляраў).

З гэтай сумы, зрэшты, толькі 114,8 млрд – не выдаткаваныя грошы, размешчаныя ў валюце і каштоўных металах.

Згодна з праектам бюджэту, у 2022–2024 гг. Мінфін плануе адправіць у ФНБ яшчэ 112 млрд даляраў, пры гэтым выдаткі з фонду будуць абмежаваныя.

Калі першапачаткова меркавалася выдаткоўваць грошы, калі ліквідная частка перавысіць 7% ВУП, то цяпер гэтая планка складае 10% у адпаведнасці з законам, які 29 лістапада падпісаў прэзідэнт Уладзімір Пуцін.

На практыцы гэта азначае, што замест 6 трыльёнаў рублёў у найбліжэйшыя тры гады з фонду на інфраструктурныя праекты і паскарэнне эканомікі выдаткуюць толькі 2,5 трыльёна.