Дзве партыі з трох адобрылі новую кааліцыю ў Нямеччыне

Тры партыі прадставілі 177-старонкавую кааліцыйную дамову 24 лістапада.

Дэлегаты надзвычайнага з'езда Свабоднай дэмакратычнай партыі (СвДП) адобрылі кааліцыйнае пагадненне з Сацыял-дэмакратычнай партыяй Нямеччыны (СДПГ) і партыяй «Саюз-90»/«зялёныя». Пра гэта паведаміла прэс-служба партыі ў сваім Twitter у нядзелю, 5 снежня. За ўдзел у «святлафоры», як гэтую кааліцыю называюць па колерах трох партый, прагаласавалі 535 дэлегатаў (92,24 працэнты ад колькасці ўдзельнікаў), 37 былі супраць, восем чалавек устрымаліся, паведамляе DW.

Раней лідар СвДП Крысціян Ліндар заклікаў дэлегатаў прыняць кааліцыйную дамову. «Гэта кааліцыйнае пагадненне палітыкі цэнтра, якое не зрушвае нашу краіну налева, а хоча весці яе наперад», - сказаў ён. СвДП «сфармуе ўрад святлафора, мы таксама будзем вызначаць дзеянні ўрада Нямеччыны», – дадаў ён.

Напярэдадні кааліцыйнае пагадненне падтрымалі 98,8 працэнта ўдзельнікаў з'езда СДПГ. «Зялёныя» ўжо праводзяць галасаванне ў шэрагах сябраў партыі. Чакаецца, што 7 снежня кааліцыйная дамова будзе падпісаная, а 8 снежня бундэстаг абярэ сацыял-дэмакрата Олафа Шольца новым канцлерам.

Планы новага ўрада

Тры партыі прадставілі 177-старонкавую кааліцыйную дамову 24 лістапада. Будучы ўрад плануе павялічыць дзяржаўныя інвестыцыі ў зялёныя тэхналогіі і цыфрызацыю, а таксама з 2023 года вярнуцца да стратэгіі, вядомай як «чорны нуль» (schwarze Null), пры якой запланаваныя выдаткі фінансуюцца не за кошт новых крэдытаў, а выключна праз бюджэтныя даходы.

Акрамя таго, новая кааліцыя мае намер прэзентаваць бязвізавы ўезд у ФРГ для расейцаў маладзейшых за 25 гадоў, спрасціць атрыманне падвойнага грамадзянства і працэдуру атрымання прытулку, а таксама права на жыхарства.