29 сакавiка 2024, Пятніца, 15:09
Падтрымайце
сайт
Сім сім,
Хартыя 97!
Рубрыкі

Кожны пяты расеец не здолеў правільна расшыфраваць абрэвіятуру СССР

24
Кожны пяты расеец не здолеў правільна расшыфраваць абрэвіятуру СССР

Амаль палова апытаных не змагла назваць ніводнай з рэспублік былога Саюза.

Амаль кожны пяты дарослы расеец не змог правільна расшыфраваць абрэвіятуру СССР - Саюз Савецкіх Сацыялістычных Рэспублік: 11% прызналіся, што не ведаюць расшыфроўку, а яшчэ 8% зрабілі гэта з памылкамі. Такія вынікі былі атрыманыя падчас апытання УЦВГД, праведзенага ў рамках супольнага праекта з РБК "30 гадоў без СССР". Большасць з тых, хто не змог адказаць правільна на пытанне, - моладзь ва ўзросце ад 18 да 24 гадоў.

Дзель жа здольных пералічыць рэспублікі былога СССР у разы ніжэйшая: усе 15 успомнілі толькі 6% рэспандэнтаў. Больш за чвэрць апытаных - 27% - не змаглі назваць ніводнай рэспублікі, а ва ўзроставай групе да 34 гадоў такіх амаль палова (48-49%). Узгадваючы назвы рэспублік, расейцы часцей за ўсё забываліся на РСФСР — Расейскую Савецкую Федэратыўную Сацыялістычную Рэспубліку, на базе якой была створаная Расейская Федэрацыя: яе назвалі толькі 28% апытаных. Такі ж вынік у Туркменскай ССР.

Апытанне было праведзенае 24 лістапада сярод 1,6 тысячы расейцаў ва ўзросце ад 18 гадоў метадам тэлефоннага інтэрв'ю. Для выбаркі максімальная велічыня памылкі з імавернасцю 95% не перавышае 2,5%, адзначае УЦВГД.

Першая паводле папулярнасці сярод рэспандэнтаў адмоўная канатацыя, звязаная з Савецкім Саюзам, - гэта дэфіцыт тавараў, чэргі ў крамах, талоны. Пра гэта ўспомнілі 5% расейцаў, прычым часцей так казалі людзі ва ўзросце 25-34 гадоў (9%) і 35-44 гадоў (7%), якія жылі пры СССР у дзяцінстве або якія нарадзіліся пасля яго распаду.

Другі паводле папулярнасці адказ у гэтай групе (4% апытаных) - асацыяцыя СССР з падманам людзей, абмежаваннем волі, застоем і беднасцю насельніцтва.

Толькі ў 1% расейцаў СССР звязаны з чырвоным тэрорам, рэпрэсіямі, расстрэламі і ГУЛАГам. Сярод людзей, якія адказалі так, больш за ўсё моладзі - 18-24 гадоў (5%) і 25-34 гадоў (3%).

Таксама 1% рэспандэнтаў успомніў пра жалезную заслону - бар'ер паміж СССР і капіталістычнымі дзяржавамі.

Напісаць каментар 24

Таксама сачыце за акаўнтамі Charter97.org у сацыяльных сетках