У кітайскім Харбіне будуць плаціць $1,5 тысячы тым, хто паведаміць аб сваім інфікаванні COVID-19
2- 6.12.2021, 21:01
- 4,564
Улады Харбіна раяць грамадзянам, якія адчулі сімптомы COVID-19, звяртацца ў лякарню.
У Кітаі, у горадзе Харбін, улады абяцаюць выплаціць 10 тысяч юаняў ($1,5 тысячы) тым, хто добраахвотна раскажа аб сваім інфікаванні COVID-19. Пра гэта 2 снежня паведаміла выданне The Beijing News са спасылкай на абвяшчэнне гарадскіх уладаў.
Улады Харбіна раяць грамадзянам, якія адчулі сімптомы COVID-19, звяртацца ў лякарню і паведамляць гісторыю сваіх кантактаў.
«Калі вы выявілі сімптомы COVID-19, такія як ліхаманка, кашаль, боль у горле, стомленасць, страта нюху, смаку, болі ў цягліцах або дыярэя, надзеньце маску, адпраўляйцеся ў найбліжэйшую клініку і паведаміце гісторыю кантактаў. Той, хто зробіць тэст і атрымае станоўчы вынік, пасля праверкі атрымае ўзнагароду сумаю 10 тысяч юаняў», - гаворыцца ў паведамленні.
Паведамляецца, што 2 снежня ў горадзе было выяўлена тры выпадкі інфікавання каранавірусам, між іншым людзі заразіліся праз кантакты з хворымі, якія прывезлі вірус з Казахстана і Манголіі.