Сотні тысяч беларусаў стаяць пад вокнамі палаца Лукашэнкі

Цяжка спакойна спаць, калі ў кожным міністэрстве, выканкаме, на кожным заводзе і фабрыцы выступілі супраць цябе.

Праглядзеў вытрымкі ўчорашняй прамовы Лукашэнкі, якую ён штурхнуў пры здзяйсненні чарговых кадравых рухаў, якія не маюць юрыдычнай сілы, піша Арцём Праскаловіч, былы супрацоўнік адміністрацыі Лукашэнкі.

Зноў дыктатар шмат увагі надаў апазіцыі. Не ўзгадаю, каб змагары турбавалі Сінія пальцы так доўга пасля даты выбараў. Пра што гэта нам гаворыць? Пра тое, што ў беларусаў усё атрымліваецца. Павольна. Але дакладна.

Толькі пра гэта падумаў і тут жа ўбачыў нататку ў "Нашай Ніве" пра чарговы ролік Максіма Каца.

«Звярніце ўвагу: вулічнай актыўнасці няма ўжо год. Усе НКА, праваабарончыя арганізацыі, незалежныя СМІ распляжаныя. А Лукашэнка выглядае і паводзіць сябе так, нібыта па-ранейшаму сотні тысяч людзей стаяць у яго пад вокнамі, нібыта па-ранейшаму ён бегае з аўтаматам».

Так, Максім агулам на баку дэмакратычных пераўтварэнняў. Так, можна рабіць некаторую зніжку на яго небесстароннасць да сітуацыі ў Беларусі. Але ўжо сапраўды ў яго і ў нас з вамі не атрымаецца назваць белае чорным і зрабіць выснову аб тым, што Лукашэнка адчувае сябе камфортна.

Уяўляеце, ён не толькі саступіў, але больш за год не можа нават стварыць традыцыйную для сябе бачнасць перамогі. Пры тым, што на гэта кінуты ўсе сілы:

у МУС скасавалі ацэнку вынікаў працы аб барацьбе са злачыннасцю - у прыярытэце толькі праца аб грамадска-палітычных пытаннях,

у дзяржорганах і арганізацыях працягваюцца чысткі, усюды прызначаюцца куратары з ліку сілавікоў,

экстрэмізмам прызнаецца ўсё, што не з'яўляецца дзяржпрапагандай, а экстрэмістам можа стаць кожны, хто мае вочы і вушы.

Цяжка спакойна спаць, калі раптоўна ў кожным міністэрстве, выканкаме, на кожным заводзе і фабрыцы не пабаяліся выступіць супраць цябе, хаця ты 26 гадоў прасіў так не рабіць.

Складана захоўваць раўнавагу, калі ніхто больш не вядзецца на тваю хлусню і не збіраецца пераварочваць старонку.

Немагчыма кіраваць, калі мільёны беларусаў нябачным ценем стаяць у цябе за спінай з нянавісцю ў вачах і гневам у сэрцах.