Як пракуратура ў Гародні «падбірала» артыкул сыну праваслаўнага святара

Вынік - 3,5 гады калоніі.

У Горадні 8 снежня суддзя вынес прысуд 27-гадоваму гарадзенцу Андрэю Аўсіевічу. Пракуратура запатрабавала пекла суда пазбавіць гарадзенца волі на 3,5 гады за нібыта «распальванне варажнечы». Справа звяртае на сябе ўвагу тым, што дзяржаўныя эксперты-лінгвісты фактычна выступілі на баку падсуднага, а пракуратура тройчы змяніла хлопцу крымінальную артыкул, каб не выпускаць яго з-за кратаў, паведамляе «Белсат».

Андрэй Аўсіевіч, сын праваслаўнага святара, за кратамі ўжо 8 месяцаў, з траўня 2021 года. Праваабаронцы прызналі яго палітвязнем.

У снежні мінулага года Андрэй далучыўся да дыскусіі на папулярным тэлеграм-канале «Гродна 97 %» і, паводле следства, учыніў злачынства паводле арт. 369 Крымінальнага кодэксу – публічна абразіў прадстаўніка ўлады, мясцовага ўчастковага Максіма Чарткова.

Андрэй не адмаўляе: быў эмацыйна ўзрушаны збіццём мірных дэманстрантаў, забойствам Рамана Бандарэнкі і тым, што міліцыя выступіла на баку рэжыму, а не беларускага народа. Але пракуратуры і следству гэтага падалося мала, яны зачапіліся за іншыя словы Аўсіевіча, напісаныя ім у тым жа тэлеграм-канале. Між іншым, увагу сілавікоў прыцягнуў допіс: «…І потым ужо памяняецца ўлада, і там ужо ўсё будзе па законе, нікога не павесяць і не паб'юць. Смецце, зразумейце, вас пры новай уладзе чакае сумленны, справядлівы суд. Пры гэтай уладзе тэрарыстаў вас чакаюць слупы… Трэцяга варыянту не дадзена. Думайце. І так, калі вы не датычныя да злачынстваў, а проста носіце пагоны, то таксама можаце пад раздачу патрапіць. Так што спыніце сваіх калегаў-злачынцаў, каб не зачапіла вас. Думайце».

Андрэя першапачаткова абвінавацілі паводле арт. 364 УК ("Пагроза прымянення гвалту ў дачыненні да супрацоўніка органаў унутраных справаў"). Хлопца затрымалі і змясцілі пад варту ў СІЗА Горадні. Пры гэтым у выснове Дзяржаўнага камітэту судовых экспертызаў у Гарадзенскай вобласці было рэзюме, што ў публічным меркаванні Андрэя Аўсіевіча ёсць негатыўныя ацэнкі, але падставаў сцвярджаць, што ён асабіста пагражаў міліцыянтам, няма.

Следства не прыслухалася да дзяржаўных экспертаў, справу палітвязня перакваліфікавалі паводле ч. 3 арт. 361 і перадалі ў суд. Адкрыты працэс над Андрэем Аўсіевічам распачалі ў жніўні 2021 года. Эксперта-лінгвіста выклікалі ў суд, і ён пацвердзіў, што ў словах Аўсіевіча няма заклікаў ні да якіх дзеянняў. Гэта азначала, што Андрэя Аўсіевіча, якога некалькі месяцаў трымалі ў следчым ізалятары, трэба вызваляць, бо складу злачынства няма.

Пракурорка Людміла Герасіменка ў такой сітуацыі запатрабавала прызначэння новай лінгвістычнай экспертызы, а суддзя Мікалай Рачынскі падтрымаў гэтую ініцыятыву. Але новая экспертыза пацвердзіла ранейшыя высновы. Пракурор у выніку зняла абвінавачанні, але хлопца не вызвалілі, а замест гэтага ў трэці раз за адныя і тыя ж словы, напісаныя ў тэлеграм-канале, змянілі абвінавачанне паводле ч. 1 арт. 130 УК (“Распальванне варажнечы”). Па гэтай артыкуле абвінаваўца запатрабавала прысудзіць Аўсіевічу 3 гады пазбаўлення волі, а паводле арт. 369 УК РБ 2 гады абмежавання і канчаткова прызначыць палітвязню 3 гады і 6 месяцаў. Суддзя цалкам задаволіў гэтае патрабаванне.