Польшча запатрабавала неадкладна пачаць расследаванне супраць «Газпрама» праз кошт газу

Варшава дамагаецца антыманапольнага разбору.

Еўрапейская камісія (ЕК) мае дастатковыя аргументы для неадкладнага запуску антыманапольнага разбору супраць «Газпрама» і павінна неадкладна гэта зрабіць. Такое меркаванне выказала ў чацвер у эфіры Польскага радыё міністарка клімату Польшчы Ганна Масква.

«Мы рашуча просім неадкладна запусціць антыманапольнае расследаванне ў дачыненні да «Газпрама», - сказала яна.

«Я буду неўзабаве сустракацца з еўракамісарам [у энэргетыцы] і буду бараніць гэты пастулат. На наш погляд, ёсць прававыя аргументы, якія ўжо цяпер дазваляюць запусціць гэтае разбіральніцтва», - адзначыла міністарка.

Паводле ейных слоў, размова ідзе аб празмерным выкарыстанні ролі манапаліста. «Гэта можа быць звязана з пакараннямі, можа быць звязана з патрабаваннем праверкі існага пагаднення паміж «Газпрамам» і еўрапейскімі краінамі», - сказала яна.

«Ёсць вельмі шмат інструментаў у рамках антыманапольнага расследавання, – дадала Масква. - ЕК выдатна ўмее гэта рабіць, шмат разоў запускала такую працэдуру».

«Для нас незразумела, чаму зараз ЕК не бачыць аргументаў для запуску такога разбору. Мы іх бачым і будзем іх паказваць, даказваць і ўгаворваць ЕК рэагаваць», - указала міністарка, паведаміўшы, што Польшча ў снежні перадала ЕК дадатковыя матэрыялы аб гэтай справе. «Спадзяёмся, што іх будзе дастаткова», - сказала яна.