Усе беларускія банкі рыхтуюць да адключэння ад SWIFT

Рэжым замітусіўся.

Усе беларускія банкі падключыліся да расейскага аналага SWIFT (Сістэмы перадачы фінансавых паведамленняў ЦБ Расеі), паведамляе РІА «Новости».

«На сёння ўсе беларускія банкі падключаныя да Сістэмы перадачы фінансавых паведамленняў», — заявіў начальнік управы дэпартамента нацыянальнай аплатнай сістэмы Банка Расеі Дзяніс Барышкоў.

Інтэграцыя сістэм перадачы фінансавых паведамленняў і разлікаў уваходзіць у адну з 28 саюзных праграм, якія зацвердзілі ў лістападзе 2021-га.

Нагадаем, што ЗША рыхтуюць новы пакет санкцыяў супраць Расеі на выпадак узброенага ўварвання ва Украіну. Дакумент уключае так званы «ядзерны варыянт» - адключэнне Расеі ад міжнароднай аплатнай сістэмы SWIFT.

Аб неабходнасці адключыць беларускую банкаўскую сістэму ад SWIFT у адказ на рэпрэсіі рэжыму супраць грамадзян краіны неаднаразова заяўлялі лідары беларускай апазіцыі.

Калі ў планаваным шостым пакеце санкцый, які абяцае быць самым маштабным за ўвесь гэты час, будзе пункт пра выключэнне Беларусі са SWIFT, то ніякія спробы кампенсаваць гэта з дапамогай расейскага аналага не дапамогуць пазбегнуць вялікіх страт. Беларусь трывала ўвойдзе ў спіс краін трэцяга свету, куды ніводзін замежны інвестар не рызыкне фундаваць свае грошы.

SWIFT — міжнародная міжбанкаўская сістэма перадачы інфармацыі і ажыццяўлення выплат, да якой падключаныя больш за 11 тысяч найбуйнейшых арганізацый амаль ва ўсіх краінах свету.