Хваля звальненняў дайшла да «Беларуськалія»

Збіраюцца скараціць дзве тысячы чалавек.

У рэдакцыю Telegram-канала Беларускага аб'яднання працоўных паступіла інфармацыя аб тым, што на ААТ «Беларуськалій» узмоцнена працуюць уласныя службы бяспекі. Раздаюцца спісы на звальненні.

«Мяркуючы па ўсім, у некаторых начальнікаў пачуццё сумлення і гонару не атрафіравалася, некаторыя смелыя кіраўнікі спрабуюць абараніць адмыслоўцаў.

У сувязі з гэтымі падзеямі многіх кіраўнікоў структурных падраздзяленняў выклікаюць на «дыван» да генеральнага дырэктара таварыства.

Таксама, паводле нашай інфармацыі, агульны спіс звальненняў па ААТ «Беларуськалій» уключае 2000 супрацоўнікаў. Лічба па аддзелах можа мяняцца ў залежнасці ад розных фактараў. На адным толькі рудніку 4 РУ ў спісе фігуруе 52 чалавекі. Кагосьці звольняць альбо прымусяць напісаць заяву на ўласнае жаданне, а камусьці проста не падоўжаць кантракт», - гаворыцца ў паведамленні Telegram-канала.

Стандартная схема для ўсёй Беларусі.

Мы можам колькі заўгодна ўздыхаць, але гэтым гору не дапаможаш. Як не дапаможаш і звычайнай салідарнасцю і падтрымкай на словах. Цяпер усе работнікі ўсіх прадпрыемстваў павінны згуртавацца як ніколі і спыніць працу датуль, пакуль спісы не будуць адкліканы, а былы ўрад не пакіне захопленую тэрыторыю.