Новы канцлер Нямеччыны Шольц перасеў на браніраваны Mercedes-Benz

Папярэднікі Шольца Мэркель і Шродар мелі ў службовым выкарыстанні Audi і Volkswagen.

Новаабраны канцлер Нямеччыны Олаф Шольц перасеў на Mercedes-Benz S680 Guard, кошт якога складае больш за €500 тысяч. Пра гэта 8 снежня паведаміла выданне Nordkurier.

Папярэднікі Шольца на пасадзе канцлера Нямеччыны Ангела Мэркель і Герхард Шродар мелі ў службовым выкарыстанні аўтамабілі Audi і Volkswagen, адзначае выданне.

Службовы аўтамабіль новага канцлера звонку мала чым адрозніваецца ад звычайнага Mercedes, аднак насамрэч гэта амаль непрыступная крэпасць вагой 4200 кг, піша выданне.

Кузаў аўто зроблены са спецыяльнай сталі, шклопакеты таўшчынёй з руку, дзякуючы чаму людзі ўнутры аўтамабіля абаронены ад стрэлаў і выбухаў. Аўтамабіль укамплектаваны спецыяльнымі коламі, якія дазваляюць яму працягваць рух нават са знішчанымі шынамі. Таксама ён абсталяваны аўтаматычнай сістэмай супрацьпажарнай абароны, якая можа гасіць агонь пад або вакол транспартнага сродку.

У выпадку газавага нападу звонку рэзервуар залішняга ціску свежага паветра забяспечвае бесперапынную падачу кіслароду ў салон, паведамляе Nordkurier.

У аўтамабілі ёсць некалькі манітораў і ўсе неабходныя камунікацыйныя і інфармацыйныя сістэмы, скураныя крэслы раскладваюцца, калі пасажыр захоча адпачыць.

Аднак канцлер не мае права кіраваць аўтамабілем самастойна, зазначае выданне. Па-першае, для гэтага яму спатрэбяцца дадатковае пасведчанне кіроўцы, а па-другое, кіраўнік урада не можа самастойна сесці за стырно з меркаванняў бяспекі.