Лукашэнка «патрапіў пад агонь» на тым фронце, дзе ён найбольш слабы

Пратэсты будуць расці і ён саступіць з імавернасцю на 100%.

Апошнім часам з вуснаў прадстаўнікоў улады прагучала шмат ініцыятыў аб «выразанні» прыватнага бізнэсу, адмовы ад рынкавай эканомікі, якой дэ-факта ў нас і не было, і наогул - да вяртання да эканамічных практык далёкага савецкага мінулага.

На практыцы многія з гэтых ідэй ужо рэалізуюцца. Гандлёвыя сеткі «выразаюцца», банкі ўціскаюцца, ІП душацца, і далей паводле спісу. Затое зноў не першае дзесяцігоддзе «ратуецца», напрыклад, велазавод, плануецца «распілаваць» яшчэ мільярд на дадатковую мадэрнізацыю славутай дрэваапрацоўкі, прафінансаваць іншыя дзяржаўныя «Тытанікі індустрыі» і, вядома, калгасы, піша Юры Пшоннік у артыкуле на сайце «Наше мнение».

У прынцыпе, усё гэта можна параўнаць са скасаваннем НЭПа Сталіным. Тады пачалося збядненне, потым галадамор, узмацненне рэпрэсій і іншыя такія з'явы. Прычым перабоі з прадуктамі харчавання, да прыкладу, пачаліся адразу ж пасля скасавання НЭПа, ужо ў 1928 годзе, гэта значыць яшчэ да калектывізацыі. Яе і пачалі для таго, каб павялічыць пастаўкі харчавання ад сялян дзяржаве. Атрымалася наадварот - голад, а не багацце. У нас пытанне так пакуль не стаіць, але пераслед за імпарт, у тым ліку харчавання, аж да крымінальнага пераследу разам з арыентацыяй на «выпальванне» прыватнага бізнэсу ні да чаго добрага прывесці не можа. Толькі да пагаршэння эканамічнай сітуацыі.

Ці яшчэ: у нас закрываюць «не тыя» гандлёвыя сеткі. Бальшавікі ў свой час мэтанакіравана выразалі купцоў, маўляў зусім непатрэбныя паразіты, казалі тады. Дзяржплан усё сплануе і справядліва размяркуе. Пасля гэтага дэфіцыт спажывецкіх тавараў назіраўся ўжо пастаянна. Аж да самага краху СССР. У нас пакуль у крамах ёсць «усё», праўда яно даражэе з кожным днём. Але ж працэс выразання купцоў у нас пакуль у самым пачатку. Вынікам такой палітыкі стане падзенне - калі не ўсёй эканомікі, то, як мінімум, узроўню жыцця грамадзян. Ён ужо і пачаўся. Дастаткова паглядзець «рахункі» за студзень. Або на цэны ў крамах і аптэках. І гэта яшчэ толькі «кветачкі», пасля выразання ўсіх «не тых» справы ў эканоміцы стануць значна горшыя. І закране гэта не толькі «просты люд», але і ніжэйшыя звёны «вертыкалі» разам з сілавікамі.

І ПВТ вельмі магчыма абяскровілі. Гэта спрабавалі зрабіць яшчэ некалькі гадоў таму. Аналагічна і з астатнім недзяржаўным бізнэсам. «НЭП» скасаваны, наперадзе «галадамор». Так, не ўвесь прыватны бізнэс закрыюць, канфіскуюць або нацыяналізуюць. Нешта фармальна застанецца прыватным, змяніўшы уладальнікаў на людзей, што возьмуць пад прамое кіраванне, фармальна не змяняючы статусу і г.д. Але ў кожным выпадку гэта дэградацыя і прыватнага сектара эканомікі і эканомікі наогул.

Пры гэтым у дзяржсектары ніякіх новых ідэй няма і не прадбачыцца, бо там толькі адзін «генератар ідэй», які захрас у мінулым і які прымае пастановы, якія дабіваюць эканоміку, а не ратуюць яе, як ён упэўнены. Эканоміка яму адназначна не падпарадкоўваецца, гэта даўно вядома. Вось ён і надумаў яе «знішчыць».

Але ў рэжыму ёсць вельмі слабыя бакі. І вось Лукашэнка пачаў вайну і на тым фронце, дзе ён найбольш слабы, дзе амаль заўсёды саступаў, у сферы эканомікі. І тут ён зноў павінен саступіць з імавернасцю калі не 100%, то 99% дакладна. Або народ змірыцца з абсалютнай галечай, або рэжым усё ж абрынецца. Але змірыцца давядзецца і найніжэйшаму звяну «вертыкалі» і сілавікам: па іх таксама «выразанне» эканомікі ударыць, яны ж таксама ў крамы ходзяць і камуналку аплачваюць. Так што пратэстная база тэарэтычна павінна расці.