Да чаго прывядзе арышт украінскай «трубы», якую ў 2019 годзе купіў алігарх Варабей?

Транспартаванне нафтапрадуктаў па трубаправодзе прыпыненае з 15 лютага.

«Нафтагаз Украіны» ухваліў перадачу арыштаванай маёмасці «ПрыкарпатЗахадтранс» на «часовае адказнае захоўванне» дзяржаўнай «Укртранснафта». Пра гэта гаворыцца ў пастанове «Нафтагаза» як адзінага акцыянера «Укртранснафты». Такім чынам нафтапрадуктаправод, які ў 2019 годзе ўзяў пад кантроль беларускі бізнэсовец Мікалай Варабей, перастае функцыянаваць. На думку экспэртаў, частка паставак дызпаліва можа быць замешчана адгрузкай з Беларусі, піша tut.by.

Згодна з пастановай НАКа, «Укртранснафта» перададуць аб'екты нерухомасці, вытворчыя, тэхналагічныя і лінейныя аб'екты. Разам яны фармуюць тэхкомплекс магістральнага нафтапрадуктаправода.

Выдаткі на захоўванне маёмасці трубаправода ацэньваюць на 200 млн грн. Гэтыя выдаткі «Укртранснафта» кампенсуе ўкраінская дзяржава.

Пры гэтым у пастанове адсутнічае тлумачэнне, калі быў арыштаваны трубаправод і хто прасіў «Укртранснафту» прыняць яго на захоўванне, звяртаюць увагу ўкраінскія СМІ.

«ПрыкарпатЗахадтранс» эксплуатуе на тэрыторыі Украіны адцінак нафтапрадуктаправода «Самара - Заходні накірунак» працягласцю блізу 800 км. Ён прызначаны для прапампоўвання дызельнага паліва з Расеі і Беларусі для Украіны і транзіту ў Еўропу.

Да 2016 года кампанія з'яўлялася структурным падраздзяленнем

«Транснафтапрадукта» расейскай «Транснафты». У лютым 2016 года «Транснафта» прадала «ПрыкарпатЗахадтранс» швайцарскай International Trading Partners AG Анатолія Шэфера. Яго звязваюць з асяроддзем «кума Пуціна», лідара апазіцыйнай партыі Украіны Віктара Медведчука. Сам Медвядчук адмаўляе сувязь з трубаправодам і пастаўкамі нафтапрадуктаў ва Украіну.

У сакавіку 2019 года Антыманапольны камітэт Украіны дазволіў вытворчаму ўнітарнаму прадпрыемству «Нафтабітумный завод», што належыць беларускаму нафтатрэйдару «Інтэрсэрвіс», атрымаць кантроль над «ПрыкарпатЗахадтранс». На той момант кампанія належала Мікалаю Вараб'ю. Пасля таго як ён у снежні 2020 года патрапіў пад санкцыі Еўразвязу, валодаць актывамі сталі мэнэджары Вараб'я.

19 лютага 2021 года Рада нацыянальнай бяспекі і абароны (РНБА) Украіны даручыла вярнуць у дзяржаўную ўласнасць нафтапрадуктаправод «ПрыкарпатЗахадтранс». Сакратар РНБА Аляксей Данілаў заявіў, што трубаправод «незразумелым спосабам» апынуўся ў прыватных руках.

З інфармацыі «Радыё Свабода», транспартаванне нафтапрадуктаў па трубаправодзе прыпыненая з 15 лютага.

У кансалтынгавай групе «А-95» думаюць, што ва ўмовах фактычнай экспрапрыяцыі трубаправода працяг паставак будзе немагчымы.

У той жа час экспэрты не бачаць перадумоў для ўзнікнення рэсурснай напружанасці на рынку. У апошнія тры гады загрузка нафтапрадуктаправода зніжалася, асноўнай прычынай было ўвядзенне летам 2019 года спецыяльнай мыты сумай 3,75% (цяпер 4%) на трубаправодныя пастаўкі расейскага дызпаліва. У выніку калі ў 2018 годзе імпарт праз «ПрыкарпатЗахадтранс» склаў 1,98 млн тонаў, то у 2019 годзе - 1,23 млн тон, а ў 2020-м - 635 тысяч тон.

- Украінскі рынак максімальна дыверсіфікаваны, і замяніць 50 тысяч тон трубаправодных паставак на месяц будзе нескладана. Гэта адбудзецца як за кошт пераарыентацыі трубаправодных аб'ёмаў на адгрузку па чыгунцы, так і за кошт рэзерваў унутранай нафтаперапрацоўкі і імпарту па моры, - заявіў дырэктар «А-95» Сяргей Куюн.

З прагнозаў экспэртаў, мінімум 20-30 тысяч тон дадаткова паступяць ва Украіну з беларускага тэрмінала ў Гомелі, дзе ажыццяўляецца перавалка расейскага дызпаліва з нафтапрадуктаправода «Самара - Заходні кірунак» на чыгуначны транспарт. Таксама з сакавіка чакаецца павелічэнне імпарту расейскага дызпаліва чыгункай праз усходнюю мяжу. Вялікі запас магутнасці для прыёму з мора застаецца ва ўкраінскіх партоў - яны задзейнічаны менш чым на 30%. Таксама можна разлічваць на невялікае павелічэнне паставак з Беларусі.

Што да кошту экспэрты не выключаюць малаважнага, у межах 1-1,5%, падвышэння аптовых коштаў ДТ у цэнтральных і заходніх рэгіёнах, дзе пераважна размяркоўвалася «трубаправоднае» дызпаліва.